2025 senesi aprelniñ 29-nda rostov-na-donu şeerindeki cenübiy bölge arbiy mahkemesi altı vatandaşqa, qırımtatar halqınıñ temsilcileri olğan Halil Mambetovğa, Refat Seydametovğa, Osman Abdurazakovğa, Löman Zekeryayevge, Ayder Asanovğa ve Ekrem Kroşqa nevbetteki qanunsız ükümler çıqardı. Uydurılğan davanıñ iştirakçileri 11 yıldan 14 yılğace apis müddetine mahküm etildi.

Siyasiy sebeplerden çıqarılğan qabaatlavlar rusiye federatsiyası cinaiy kodeksiniñ 205.5 ve 30, 278-nci maddelerine köre “terror teşkilâtınıñ faaliyetinde iştirak etüv” ve “akimiyetni zorbalıqnen zapt etmege azırlanuv” iddiasınen bağlı.

Çoq sayılı protsessual bozuvlar arasında advokatlar tintüvlerniñ qanunsızlığına, kerekli isbatlarnıñ olmamasına, operativ ve araştırma faaliyetinden materiallarnıñ kerekli cedvelge alınmayıp qullanılmasına, cinaiy işniñ bütün basamaqlarında qorçalanuv ve qorçalayıcınıñ iştiragine aqqlarnıñ bozulmasına diqqat çektiler. Qabaatlanğanlar tek diniy inançları ve faal vatandaşlıq pozitsiyası içün taqip etilgenlerini bildirdiler.

Halil Mambetov, Refat Seydametov, Osman Abdurazakov, Löman Zekeryayev, Ayder Asanov ve Ekrem Kroşnıñ davası Qırımda işğalciler tarafından halqara gumanitar uquqnıñ sistemalı bozuluvınıñ daa bir misalidir. Qanunsız tintüvler, apiske atuvlar, uydurma qabaatlavlar, diniy inançlar içün taqipler ve adaletli mahkeme aqqını red etüv – bu İnsan aqları ve esas serbestliklerni qorçalav konventsiyası, IX Jeneva konventsiyası ve esas halqara uquq printsipleriniñ ciddiy bozuluvıdır.

Bugünge qadar rusiye işğal etilgen Qırımda uydurılğan “terrorizm”, “ekstremizm” ve “devlet hainligi” qabaatlavlarınen 224 Ukraina vatandaşınını azatlıqtan marum etti. Olar arasında 134 mabüs – qırımtatar halqı temsilcisi.

Temsilcilik bu qanunsız ükümlerniñ çıqarılmasını takbih etip, qanunsız şekilde mahküm etilgenlerge ve olarnıñ qorantalarına destek bildire. Temsilcilik işğalci memuriyet tarafından siyasiy sebeplerden taqipke oğratılğan Ukraina vatandaşlarınıñ aqlarını qorçalamaq içün bütün mümkün olğan diplomatik ve halqara uquqiy tedbirlerni işletmege devam etecek.

Biz halqara toplulıqnı vaqtınca işğal etilgen Qırımda nevbetteki insan aqları bozuvlarına qararlı cevap bermege, rusiyege siyasiy ve sanktsiya basqısını arttırmağa, Ukraina vatandaşlarınıñ siyasiy sebeplerden taqip etilmesini tez vaqıtta toqtatmaq içün küçlerni birleştirmege çağıramız.