Kıyivde Hreşçatikteki “Sens” kitaphanesiniñ ziyaretçileri Qırım siyasiy mabüslerine 214 mektüp yazdı. “Serbest Qırımğa mektüpler” teşebbüsi kitaphanede fevralniñ 20-nden 27-ne qadar çalıştı, teşebbüske lâqayt olmağan er kesniñ qoşulması mümkün edi. 

“Serbest Qırımğa mektüpler” – bu Ukraina Prezidentiniñ Qırım Muhtar Cumhuriyetindeki Temsilciligi, PEN Ukraina ve ZMİNA insan aqları merkeziniñ ortaq teşebbüsidir, teşebbüske ayrıca “QırımSOS” cemaat teşkilâtı, “Qırım ceryanı” cemaat teşkilâtı, “Crimea Daily” media teşebbüsi de qoşuldı. Teşebbüs çerçivesinde Qırımda işğalciler tarafından tevqif etilgen ya da işğal etilgen Qırımdan qanunsız şekilde rusiyedeki apishanelerge köçürilgen Ukraina vatandaşlarına mektüp yazmaq mümkün.

Teşebbüsniñ esas maqsadı siyasiy mabüslerge ve olarnıñ qorantalarına qol tutmaq, ukrain ve halqara toplulıqlarnı siyasiy mabüsler aqqında haberdar etmek, işğalci memuriyetlerge er bir qanunsız mahküm etilgen Ukraina vatandaşı devletniñ ve cemiyetiniñ diqqatı altında olğanı aqqında signal yollamaqtır.

Martnıñ 3-nde olğan malümatqa köre, rus işğalci idaresi terrorizm, ekstremizm, satqınlıq kibi uydurma qabaatlavlar boyunca 221 insannı, şu cümleden 134 qırımtatarnı qanunsız şekilde mahküm etti.

Qırım er bir qırımlı siyasiy mabüsniñ yüregindedir, o, şimdi rusiyeniñ eñ şimaliy noqtasında olsa bile. Qırımlı siyasiy mabuslerniñ bedenleri pancalarda olğanına baqmadan, olarnıñ ruhu ve yürekleri serbest. Şunıñ içün de bu mektüpler serbest bir Qırımğa, Qırımlı siyasiy mabüslerniñ er birine yollanacaqtır.

2025 senesi fevral ayınıñ başında teşebbüs teşkilâtçıları aktsiyanıñ daimiy şekilde, soñki siyasiy mabğs azat etilgence devam etecegini bildirdi.

#BirBirimizİçün