Bugün “Artek” halqara bala merkeziniñ idaresi Temsilcilik ofisini ziyaret etti.
Körüşüvde 2025 senesi iyünniñ 16-nda lagerniñ 100 yıllığına bağışlanğan tedbirlerge azırlıqlar muzakere etildi. Balalarnıñ mecburiy sürgün etilmesi, olarnıñ qanunsız yerlerini avuştıruv içün tranzit zonası olaraq Qırımnıñ qullanılması, rus teşviqatına qarşılıq kösterilmesi kerekligi, Qırım yarımadası aqqında bilgilerni arttırmaq içün tasil programmaları yaratılması kibi mevzularğa da ayrıca diqqat ayırıldı.
Muzakerede Daimiy Temsilci Olga Kurışko, Temsilcilikniñ Malümat teminlevi bölüginiñ yolbaşçısı Yevğen Bondarenko, “Artek” Halqara bala merkeziniñ baş müdiri Serğiy Kapustin, Baş müdirniñ birinci muavini Darya Muha ve Devlet işleri idaresiniñ sağlıq qoruv ve sanatoriy-kurort müessiselerihızmetiniñ reberi Dmıtro Slobodânük iştirak ettiler.
Daimiy Temsilci işğalcilerniñ ukrain balalarını qaçırmaqnı devam etkenlerinin, olarnı zornen rusiyege alıp ketkenlerini ya da sürgün etilmeleri içün vaqtınca işğal etilgen Qırımnı tranzit zonası olaraq qullanğanlarını aytıp berdi. Olga Kurışko 2024 senesi Temsilcilik “Ukrain balalarını işğal etilgen Qırımğa/vastasınen zornen sürgün etüv” adlı analitik qaydını neşir etkenini, anda ukrain balalarını zornen köçürüv, olarnı raatlıq yerlerine ve lagerlerge yerleştirüv, qanunsız şekilde evlâtlıqqa aluv faktları tafsilâtlıca añlatılğanını qayd etti. Ukraina ve halqara insan aqları teşkilâtları bu areketlerni balalarnı bir milliy gruppadan başqasına zornen köçürüv areketi olaraq degerlendire ve genotsid olaraq saya.
Rusiye teşviqat, zornen ruslaştıruv, askeriyleştirüv vastasınen balalarnıñ ukrain kimligini sistematik şekilde yoq ete. Bu aqta öz çıqışında Temsilcilikniñ Malümat teminlevi bölüginiñ yolbaşçısı Yevğen Bondarenko bildirdi. O, işğalcilerniñ rus añlatuvlarını tarqatıp, ukrain medeniyetini maqsatlı sürette yoq eteyatqanlarını ve bu cinayetlerniñ susturılması tek olarnıñ işine kelecegini qayd etti, onıñ içün halqara meydanda buña diqqat ayrılması pek müimdir.
Körüşüv iştirakçileri balalarğa Qırım aqqında malümat berecek tasil programmaları yaratılması kerekligini de ayrıca qayd ettiler. Ukrain balaları yarımadanıñ medeniyeti, tabiatı, tarihiy mirası aqqında aqiqatnı bilmek kerekler, çünki cemiyette böyle bir talap bar.