Bugün Rusiye tarafından 18 yıl apis cezasına mahkün etilgen qırımtatar faali İnver Bekirovnıñ ikâyesini aytıp berecekmiz. 

Apisten evel yaşayışı

İnver Bekirov 1963 senesi yanvarniñ 1-nde Tacikistannıñ Duşanbe şeerinde doğdı, onıñ qorantası biñlerce diger qırımtatarlarnen beraber 1944 senesi totalitar sovet rejimi tarafından Qırımdan sürgün etildi. Mabüsniñ balalığı ve yaşlığı sürgünlikte keçti.

Tehnikumnı bitirgen soñ buldozercılıq zenaatını qazandı ve aynı vaqıtta erkekler içün urba tiküv tasilini aldı. Bundan ğayrı o, klassik küreşnen meraqlana edi.

1990 senesi siyasiy mabüsniñ qorantası Qırımğa qaytıp kele, Yalta rayonınıñ Qızıltaş köyünde yerleşe. İnver yarımadağa qaytıp kelgen soñ, qurucılıq, bezetüv, tamir işleri ile oğraşa.

İşğalciler neler uydurıp çıqardı?

2016 senesi fevralniñ 11-nde işğalciler Yalta ve Aluştada qırımtatarlarnıñ evlerinde bir sıra kütleviy tintüvler ötkerdiler. O künü tutulğanlar arasında İnver Bekirovdan ğayrı Muslim Aliyev, Vadim Siruk, Emir-Usein Kuku bar ediler. Üç aydan soñ Arsen Cepparov ve Refat Alimov da böyle etip qanunsız tutıp alındılar.

Uydurılğan dava şahsiy qonuşmalarnı diñlev, audioyazmalardan alınğan manipulâtiv, köntekstten tış ekspertizalarğa ve cinaiy işlerni uydurmaq içün qullanılğan anonim şaatlarnıñ şaatlıqlarına esaslanğan edi.

Hususan, iş materiallarında qırımtatarlarnıñ İslâm degerlikleri ve qırımtatar halqınıñ tarihı muzakere etilgen toplaşuvda iştirak etüvi bar. Qırımnı işğal etmekniñ qanunsızlığı ve yarımadanıñ tamır halqından alınması aqqındaki beyanatlar ise deñiştirilip, “terrorcılıq faaliyetinde” qabaatlavlar içün esas olaraq qullanıldı.

Üç yıldan ziyade devam etken mahkeme ise 14 daqqada bildirilgen ükümnen yekünlendi.

İnver Bekirovnıñ apiske atılmasınıñ asıl sebebi nedir?

İnver Bekirov öz cemaatınıñ faal azaları olıp, işğal memuriyeti tarafından taqipke oğrağanlarnıñ qorantalarına destek kösterip, diniy tedbirler teşkil etip, qırımtatar kimliginiñ saqlanılmasına issesini qoşa edi. O, uydururlğan davalar boyunca mahkeme oturuşuvlarında iştirak etip, repressiya qurbanlarına maddiy ve maneviy yardım köstere edi. Onıñ apiske atılması qırımtatarlarnıñ etnik ve din mensüpligi, vatanperverligi ve boysunmağanları içün işğalci memuriyet tarafından alıp barğan maqsatlı taqip kampaniyasınıñ bir qısmı oldı.

İnver Bekirov şimdi qayda?

2019 senesi noyabrniñ 12-nde rusiyeniñ rostov-na-donu şeerindeki mahkeme İnver Bekirovnı 18 yıllıq hattı rejimli apis müddetine mahküm etti. 

Qanunsız ceza qararı çıqarılğan soñ, mabüsni rusiyeniñ başqortostan cumhuriyetindeki salavat şeeriniñ 2-ncı koloniyasına yiberdiler.

Apiste bulunğan vaqıt içinde onıñ sağlıq vaziyeti yaramadı, mabüs mikroinsult oldı, bundan ğayrı, qan basımı ep yüksele, areketler koordinatsiyası bozuldı ve ara-sıra afızasını ğayıp ete. Onıñ ağır vaziyetine baqmadan, cezahane idaresi kerekli yardımnı köstermey, atta tıbbiy tevsiyelerni nazarğa almayıp, onı ceza ücresine de yerleştirmekni baqıp çıqtı.