2025 senesi dekabrniñ 25-nde Ukrayina Nazirler Kabinetiniñ 1709-ncı Qararı küçke kirdi, anda Ukrayina vatandaşlığını ve tış memleketke ketmek içün Ukrayina vatandaşınıñ pasportını resmiyleştirüv ve berüvni nizamlağan normativ-uquqiy aktlarğa deñişmeler yer almaqta.

Bundan soñ bir ziyarette eki vesiqa — özüñiz ya da 14 yaşınace balalar içün kimlik ve tış pasportnı — bir kerede resmiyleştirmege mümkün. Bir kerede resmiyleştirüv içün vesiqalar Ukrayinada, em de tış memleketlerde Devlet köç hızmetiniñ bölüklerinde, memuriy hızmetler merkezlerinde (MHM) ya da ”Pasport hızmetleri” merkezlerinde qabul etile.

Bu deñişmeler vaqtınca işğal etilgen topraqlardan olğan sakinlerge nasıl tesir etecek??

Birinciden, bu qararda, yaşağan yerni tasdıqlav tertibi, muvaqqat işğal etilgen topraqlarda yaşağan vatandaşlarnıñ kimligini identifikatsiya ve belgilev tertibi qayd etilgendir.

Hususan, Ukrayina vatandaşı pasportı içün muracaat etkende 1994 senesi numünesindenki pasport (kitap şeklinde) mebcut olıp, onıñ doğrulığı şimdiki vaqıtta bölge Devlet köç hızmetiniñ ya da İçki işler nazirliginiñ bölügi tarafından tasdıq etilemey olsa, belgilev içün başqa vesiqalarnı qoşmaq mümkün. Bular yerleşüv yeri aqqında şaatlıq, arbiy tasdıqname, aydavcılıq ya da pensiya şaatlığı ve ilâhre ola bile. Böyleliknen, vaqtınca işğal etilgen topraqlarnıñ sakinleri öz kimligini tasdıqlamaq içün daa çoq imkânğa saip olacaqlar.

Ondan da ğayrı, vaqtınca işğal etilgen topraqlarnıñ sakinlerine ait vesiqalar müessiselerniñ çalılmaması sebebinden teşkerilip olamasa, amma aynı vaqıtta bu vesiqalar reyestrlerde ya da malümat bazalarında olsa, arizacı olarnı öz arizasında köstere bile. Hadimler pasport almaq içün arizanı toldurğanda bu malümatnı teşkerirler.

Ayrı müim tertip – şahısnı belgilevdir. Bu, hususan, fotoresimli pasportı olmağan, tek, misal olaraq, doğum şeadetnamesi ya da işğalci memmuriyet tarafından berilgen ”vesiqaları” olğan vaqtınca işğal etilgen topraqlardan, şu cümleden vaqtınca işğal etilgen Qırım Muhtar Cumhuriyetinden olğan vatandaşlarnı da alaqadar etmekte. Böyle vaziyette, yañı deñişmelerge köre, Ukrayinağa kelmeden, ”Dokument” devlet müessisesiniñ ayrı bölüginde ariza berüvciniñ iştiraginen videokonferentsiya rejiminde aydınlatuv protsedurasından keçmek mümkün.

Böyleliknen, qarar vaqtınca işğal etilgen territoriyalarnıñ sakinleri içün pasport aluv tertibatlarını sadeleştire. Temsilcilik öz tarafından vatandaşlarğa böyle meselelerni çezüvde de yardım ete.