On eki yıl berli Qırım Rusiyeniñ işğali altında buluna — repressiyalar, qorqutuvlar ve basqılar yarımada sakinleri içün endi alışılğan bir şey oldı, lâkin bu olar içün esas ğayeni bozıp olamadı: Qırım Ukrayinanıñ bir parçası olıp qalmaqta.

Milliy Qarşılıqlar Merkezinen beraberlikte alıp barılğan #qarşılıq_areketi teşebbüsi çerçivesinde, işğalge baqmadan, ukrayin menliginden vazgeçmegen insanlarnıñ şaatlıqlarını toplay ve aydınlatamız. Bundan da ğayrı, biz işğalci akimiyetniñ cinayetlerini ve tınç sakinlerge qarşı zorbalıqnı vesiqalaymız. Bu ikâyeler, daimiy qorqu şaraitinde bile serbestlik ve qarşılıq kösterüv isteginiñ ğayıp olmağanınıñ isbatıdır.

• Rusiyeniñ Krasnodar bölgesiniñ mahkemesi 2022 senesi içtimaiy ağlardaki tefsirler vastasınen, sözde “terrorizmge cemaat çağıruvları” aqqında uydurılğan qabaatlavlarnen vaqtınca işğal etilgen Qırım sakinini 5 yılğa mahküm etti.
• Moskvadaki mahkeme Canköy rayonınıñ 34 yaşındaki sakini Yevgen Şvedni Ukrayina mudafaa küçleriniñ sözde “qırım köprüsine” yapılğan ücümlerni desteklegeni sebebinen “terrorizmni aqlama” aqqında uydurılğan qabaatlavlarnen umumiy rejim koloniyasına 4 yılğa mahküm etti.

Daimiy basqı, taqipler ve telükege baqmadan, işğal etilgen yarımadada adım-adım keniş qarşılıq areketi qurulmaqta. Endi cesaretniñ ayrıca areketleri degil de, tüşünceli ve izçen areket etecek koordinatsiyalanğan toplulıqlar aqqında söz yürsetile. Olarnıñ arasında timsaller, yarlıçıqlar ve listovkalar yardımınen cemaat meydanına ukrayin barlığını qaytarğan “Sarı şerit” (“Jovta striçka”) areketi şahsiy yazılar formatı vastasınen işğal altında yaşağan qırımlı qadınlarınıñ ayatı ve tecribeleri aqqında ikâye etken “Zla Mavka” leyhasını da alıp barmaqta.

Böyle teşebbüsler rejim tarafından qoyulğan qorqunı boza ve açıq-aydın köstereler: Qırım susmay, vazgeçmey, atta işğal şaraitinde bile serbestlik oğrunda küreşni devam ete.

• “ATEŞ” partizan areketiniñ agentleri Qırımdaki rus işğalci qurulışlarınıñ faaliyetini sistemalı sürette maydanğa çıqarmağa devam eteler. Aqmescitte yerli ealige qarşı repressiyalarnıñ esas aletlerinden biri olğan sözde “Qırım Cumhuriyeti prokuraturası” binasınıñ araştırılması keçirildi. Bundan ğayrı, “ATEŞ” agentleri Aqmescit şeer civarındaki FSB-niñ ihtisaslaştırılğan radioelektron razvedka postını teren şekilde teşkerip çıqtılar, bu noqtaq, radio ava dalğalarını, yöneliş tapuv signallarını ve ukrayin taraflı vatandaşlarnı belgilemek ve areketlerini közetmek içün qullanıla.

Siyasiy repressiyalarnen beraber işğalci idare qanunsız şekilde memuriy basqılarnı da faal sürette qulllanmağa devam ete. 2026 senesi yanvarniñ 14-nde berilgen malümatqa köre, vaqtınca işğal etilgen Qırımda “rusiye federatsiyasınıñ silâlı quvetlerini itibardan tüşürüv” aqqında rf memuriy cinayetler kodeksiniñ 20.3.3 maddesine köre açılğan 1664 dava qayd etildi. 1542 davada para cezalarınıñ berilmesi ya da davalarnıñ birleştirilmesi aqqında qarar alındı. 9 davanıñ baqılması devam ete.