Daimiy Temsilci Olga Kurışko Türkiyedeki ukrayin cemaatınıñ vekillerinen körüşti. Tedbir Ukrayinanıñ Türkiye Cumhuriyetindeki elçiliginde birinci kâtip Vyaçeslav Homenkonıñ iştiraginen olıp keçti.

Körüşüv devamında taraflar vaqtınca işğal etilgen topraqlardaki vaziyet ve vaqtınca işğal etilgen Qırımdan köçip kelgen Ukrayina vatandaşları rastkelgen qıyınlıqlarnı muzakere ettiler. Suallerniñ büyük bir qısmı tek ukrayin doğum şeadetnamesi olğan şahıslar içün vesiqalarnıñ işlenmesine ait edi. Daimiy Temsilci Qırım sakinleri içün vesiqalarnı aluv meselesi Temsilcilikniñ esas çalışma saalarından biri olğanını ve bu vaziyetniñ çezilmesi içün kerekli ricalar mesülietli nazirliklerge yollanılğanını bildirdi. Ayrıca Olga Kurışko vaqtınca işğal etilgen topraqlardan kelgen abituriyentlerge devlet yardımınıñ müimligini de qayd etti.

Körüşüvniñ soñunda Daimiy Temsilci körüşüv iştirakçilerine açıq dialog içün teşekkür bildirdi ve tış memleketlerde bulunğan ukrayinlernen, hususan Qırımnıñ işğalinden zarar körgenlernen daima bağda olmaqnıñ müimligini qayd etti.