İş ziyaretiniñ bir qısmı olaraq, Daimiy Temsilci Olga Kurışko Türkiyeniñ Tışqı işler nazirligine bağlı ve tışqı siyaset, halqara munasebetler ve havfsızlıq boyunca araştırmalar alıp barğan yetekçi analitik merkezlerden biri olğan Strategik araştırmalar merkezinde (SAM) iş toplaşuvı keçirdi.

Toplaşuvda Ukrayinanıñ Türkiyedeki elçiliginiñ vekilleri de iştirak ettiler.

Körüşüv devamında Olga Kurışko işğal etilgen Qırımdaki umumiy vaziyet aqqında malümat berdi, yarımadada insan aq-uquqlarınıñ sistemalı sürette bozulğanını ayrıca qayd etti.

Ayrıca, Daimiy Temsilci işğal etilgen yarımadada tecavuzcı devlet tarafından keçirilgen hususiy mülk ve topraq arazileriniñ sözde “devletleştirüvi” altında keçken keñ ölçüli kampaniyası aqqında aytıp berdi. Bundan ğayrı Daimiy Temsilci “rekonstruktsiya” altında rusiye ukrayin ve qırımtatar medeniy miras obyektlerini yoq etkenini, işğalcilerniñ siyasetleri ise işğal etilgen Qırımdaki ukrayin vatandaşlarını ana tilini ögrenme ve onı açıq şekilde qullanma aqqından marum etkenini ifade etti.

Olga Kurışko, qırımtatarlar işğal etilgen Qırımda ale daa eñ çoq taqip etilgen gruppa olaraq qalğanını — bu fakt Avropa İnsan Aqları Mahkemesiniñ qararınen tasdıqlanğanını da añlattı.

Körüşüvniñ soñunda taraflar analitik saada ortaq leyhalarnıñ kelecegini, em de strategik tetqiqatlar merkezini ekspert seviyesinde işbirlikke celp etme imkânlarını, hususan Qırım platformasınıñ ekspert ağınen tesirleşüv meselelerini müzakere ettiler.