Apisten evelki yaşayışı

Alim Karimov 1994 senesi aprelniñ 8-nde Aqmescit şeerinde doğdı. O, eñ kiçik bala olğan çoq balalı qorantada östi. Anası oğullarını bir özü östürdi, şunıñ içün Alim 9-ıncı sınıfnı bitirgen soñ, çalışmaq ve qorantasına yardım etmek içün ğıyabiy bölükke keçmege mecbur oldı.

Mektepni bitirgen soñ, ağır maddiy vaziyeti sebebinden aliy oquv yurtuna kirmege çaresi olmay. İşke kire, başta qurucılıqta, soñra şeerlerara takside çalışa. Apis atılmazdan evel o, reklamanen oğraşa edi.

2018 senesiniñ başında Alime evlendi, aynı şu yılnıñ soñunda onıñ oğlu İsa doğdı.

Alim semetdeşleriniñ evlerinde işğalciler tarafından keçirilgen tintüvler ve mahkeme oturuşuvlarına da faal sürette qoşula, siyasiy mabuslerniñ qorantalarına qol tuta edi, Stroganivka qasabasında bala bayramlarını teşkil etüvde iştirak ete edi.

Taqipler

Alim Karimovnıñ taqip etilmesi 2017 senesi fevral ayında başlandı. O künü o, Qırımnıñ daa doquz sakininen beraber tintüv vaqtında vatandaşlarına qol tutqanları içün beş künge tevqif etildi. Bundan evel ise, onı taqip ete ediler.

2019 senesi martnıñ 27-nde işğalciler Aqmescitte 26 qırımtatar evinde kütleviy tintüvler keçirdiler. Bazılarında pasportlar, telefonlar, kitaplar tartıp alındı, olarğa qarşı fizikiy zorbalıq usulları qullanıldı. Tintüvlerden soñ işğalciler 20 qırımtatarnı, şu cümleden Alim Karimovnı tutıp aldılar. Olarnıñ episi “Qırım musulmanları davasında” çerçivesinde, hususan, rusiyede terroristik sayılğan “Hizb-ut-Tahrir” iteşkilatında iştirak etüv iddasınen qabaatlandılar.

Ondan soñ rostov-na-donu şeeriniñ cenübiy arbiy “mahkemesi” Alim Karimovnı 13 yılğa mahküm etti. “Mahkeme” odasında üküm ilân etilgen soñ, o, işğalcilerge böyle dedi: “Böyle cezalardan soñ, siziñ memleketiñiz Şimaliy Koreyağa çevirile”.

Apisteki yaşayışı

Alim Karimovnıñ tevqif etilmesinden soñ, onıñ advokatları apellâtsiya arizasını berdiler. Lâkin sözde “mahkeme” sıñırlav tedbirini uzatıp, bütün apellâtsiyalarnı red etti.

Bundan ğayrı, davanıñ baqıluvı vaqtında “mahkeme” materiallarınen tanıştıruv vaqtını sıñırladı, bu ise mudafaa azırlamaq içün kerekli olğan vaqıt qaldırmadı.

Alimniñ özü mahkeme oturuşuvları vaqtında davanıñ siyasiy sebeplerden dolayı peyda olğanı açıq-açıq aytqan edi. Ve bu vaqıt devamında o, qorantası ve kiçik oğlundan marum etilip, parmaqlıqlar artında bulunmaqta.