Vaqtınca işğal etilgen Qırımda rusiye ‘‘saylavlarınıñ’’ tanılması boyunca jurnalistlerniñ suallerine cevap berir eken, ‘‘Avstriyanıñ noqtaiy nazarından Qırımnıñ ilhaqı qanunsız olğanı bellidir. Avropa Birligi de aynı fikirde. Onıñ içün, Qırım topraqlarında qanuniy şekilde Rusiye parlamentine ve Rusiye Prezidenti saylavlarını keçirmege mümkün degil. Bütün Avstriya Ükümetü de buña bir ağızdan qol tuta’’, dep qayd etti Avstriya Cumhuriyetiniñ Federal Prezidenti Aleksander Van der Bellen.

Ukraina devletinin Başlığı Avstriya Prezidentine ve Ükümetine olarnıñ resmiy noqtaiy nazarları içün teşekkürini bildirip, ‘‘beraberlikte ve uygunlaşıp yapılğan areketler ahır-soñu em Donbassta, em Qırımda bütün ukrain topraqlarınıñ azat etilüvine ketirecegine’’ eminligini bildirdi.

Bundan da ğayrı, Prezident sözde ‘‘sayavlarnıñ’’ teşkil etilüvinen doğrudan-doğru oğraşqan er kesni mesüliyetke çekmek ve olarğa qarşı şahsiy sanktsiyalarnı kirsetmek kerek olğanını qayd etti.

Petro Poroşenko bütün avropalı ortaqlarını ve bütün dünyanı ‘‘Moskova tarafından, Qırım yarımadasınıñ ilhaq etilmesiniñ dörtünci yıllığına bağışlanıp, işğal etilgen Ukrainanıñ Qırım topraqlarında kelecek bazar künü yapılacaq kösterüvge’’ qattı sürette cevap bermege çağırdı.

Ukraina Prezidenti tarihiy derslerniñ ve vaqialarnıñ, mesüliyetniñ, demokratiya qıymetleriniñ qorçalavınıñ ve pekitilmesiniñ müimligi boyunca eki prezidentniñ umumiy noqtaiy nazarını qayd etti. Aynı vaqıtta, ‘‘Cevabımız ne qadar qattı olsa, o qadar tez Rusiyeni halqara uquqnıñ çerçivelerine qaytarırmız’’, – dep ayttı o.

‘‘Devletimizniñ Şarqında soñki adiseler, yani ilân etilgen ateşni kesüvge riayet etilmemesi, Avstriyadaki soñki vaqialar, Ukrainada terroristik taqımlarğa qol tutuv, şübesiz ki, Rusiyege halqara uquqnı ürmet ettirmek maqsadınen birlikte yapılacaq mütenasip areketlerniñ müimligini bir kere daa tasdıqlay’’, – dep yekün çekti Ukraina devletiniñ başlığı.