2018 senesi qural ay (mayıs) 31 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar hızmetiniñ hadimi Taisiya Tkaçenko, Qıynav ve başqa insafsız, insaniyetsiz ya da aqaretleyici davranışlar ve cezalavlar boyunca BMT Mahsus maruzacısı Nils bey Melzer ile iş körüşüvini keçirdiler.

Körüşüv esnasında Qırımda bulunğan, vaqtınca işğal etilgen topraqlardan kelgen, ya da yarımadadan memleket içinde köçken şahıslar hususında em işğalci devlet, em de Ukraina tarafından qıynavlar boyunca halqara mecburiyetlerge riayet etüv muzakere etildi.

Borıs Babin Mahsus maruzacını ve BMT ofisiniñ hadimlerini insan aqlarınıñ qorçalavı saasında Temsilcilikniñ vekâleti ve kündelik faaliyeti ile tanıştırdı. İşğal etilgen Qırımda Rusiyeniñ cinaiy, protsesual ve penitentsiar qanun ve qaideleri qanunsız şekilde üküm sürip, işğalci akimiyetniñ cezalav organlarınıñ nezareti altında ya da apishanelerinde bulunğan şahıslarnıñ belli derecede vaziyetlerini mürekkepleştirgenine diqqat çekildi. Aqmescitniñ rıqma-rıq tolu taqiqat izolâtorında 700 insan yerine eki-üç qat ziyade maküm bulunğanı, olar kütleviy şekilde qıynalğanı qayd etildi. Aqmescitte Qızıl Haç Halqara Komiteti Moskova regional eyetiniñ ofisi çalışqanına baqmadan, Qızıl Haç Halqara Komiteti öz vekâleti boyunca Qırımdaki mabuslarğa yardım etmege imkânı olmağanına da Mahsus maruzacısınıñ ayrıca diqqatını çektiler.

Keriç şeerinde işğalciler tarafından zapt etilgen penitentsiar müessisesinde bir qaç ‘‘imtiyazlı’’ mabus sebebinden başqa makümlerlerni stalin kontslagerleriniñ añanelerine riayet etip kütleviy şekilde qıynağanları aqqında haber ettildi. Mahsus maruzacısınıñ vekâleti çerçivesinde adaletsizlikniñ ve qanunsızlıqnıñ daa bir misali olaraq İlmi Umerov mecburiy psihiatrik teşkerüvge oğratılğanını, yaqalanğan qırımtatar faalcilerni zalımlar kütleviy şekilde köteklegenini, Renat Paralamov ise canavarca qıynalğanını, Reşat Ametovdan başlap, işğalciler tarafından hırsızlanğan şahıslarnıñ vucutlarında qıynav alâmetleri olğanını da hatırlattılar.

Al-azırnda reineler vaziyetinde rusiye askerleriniñ nezareti altında bulunğan ‘‘0041’’ ukrain balıqçı gemisiniñ taqımına ve bu şahıslarnıñ qoranta azalarına fizikiy basqınıñ isbatları ketirildi. Bütün siyasiy mabuslar Qırımdan çıqarılıp, olarnıñ qoranta azalarına mütenasip ruhiy basqı yapmaq ve olarnıñ özlerini qıynamaq niyetinen Rusiyeniñ uzaq regionlarında azatlıqtan marum etilgenine de ayrıca diqqat çekildi.

Rusiye kene de esas insan aq-uquqlarını ihmal etip, Qırımnıñ ilhaqını qanunlaştırmağa tırışa, Qırımnı ‘‘Rusiyeniñ bir parçası’’ olaraq tanımaq şartınen Rusiye BMT Mahsus maruzacısınıñ Qırımğa ziyaretinen razı olacaq. Böyle vaziyette qıynavlarnıñ ve zalımca muameleniñ qurbanlarına yardım etmek içün BMT Mahsus maruzacısı tarafından yapılacaq muayyen adımlar belgilendi. Vaqtınca işğal etilgen Qırım ealisininiñ aq-uquqlarını qorçalamaq maqsadınen, istilâci devletke qarşı BMT Komitetine mütenasip devletler ara muracaatlarnen beraber, 1984 senesi qabul etilgen Qıynav ve başqa insafsız, insaniyetsiz ya da aqaretleyici davranışlar ve cezalavlar boyunca BMT Konventsiyası ile belgilengen tedbirlerniñ yerine ketirilüvi de muzakere etildi.

Şunı da qayd etmeli ki, soñki bir qaç ay devamında ne de Qırım ile memuriy sıñırında KÇNN-dan keçken, ne de Ukrainağa boysunğan topraqlarda apishanelerde oturğan, ya da apishanelerden azat etilip, öz aq-uquqlarını yerine ketirmek içün Temsilcilikke muracaat etken şahıslardan ukrain akimiyetiniñ vekillerine qıynav ya da zalımca muamele boyunca şikâyetler yapılmadı.