Сumaaqşamı künü, ilk yaz ayı (iyün) 14 künü, Avropa parlamenti Rusiyede insan aqları saasında vaziyet boyunca rezölütsiyanı qabul etti. Oña Strasburgta plenar oturuşında 485 deputat qol tuttı, 76 mebus qarşı çıqtı ve daa 66-sı tarafsız oldı.

Avropa parlamenti Rusiyede ve işğal etilgen Qırımda insan aqlarınıñ kütleviy ve muntazam şekilde bozuluvını qattı şekilde taqbih etti ve rusiye akimiyetinden deral ve iç bir türlü şartlar qoymadan cemi qanunsız alda tutulğan siyasiy mabuslarnı azat etmege talap ete.

Bu aqta cumaaqşamı qabul etilgen Avropa parlamentiniñ ‘‘Rusiye ve hususan siyasiy mabus Oleg Sentsovnıñ işi aqqında’’ rezölütsiyasında qayd etildi.

‘‘Avropa parlamenti rusiye reberiyetinden deral ve şartsız Oleg Sentsovnı ve qanunsız alda Rusiyede ve işğal etilgen Qırım yarımadasında tutulğan başqa ukrain vatndaşlarnı azat etmege talap ete’’, – dep qayd etile işbu vesiqada.

Al-azırda böyle ukrainalılar-siyasi mabuslarnıñ sayısı 70-ke yaqındır. Vesiqada umumen 70 kişiden ziyade olıp, RF-da ve işğal etilgen Qırımda tutulğan cemi ukrain siyasiy mabuslarnıñ adları añıla, jurnalist Roman Suşçenko da bu sıradadır.

Avropa parlamentiniñ deputatları ukrain kinorejissör ve siyasiy faalci Sentsov qural ay 14 kününden başlap rusiye rejimi tarafından qanunsız tutulğan bütün vatandaşlarnı azat etmek talabınen açlıq tutqanını hatırlattılar ve onıñ ile birdemligini bildirdiler.

Rezölütsiya RF-da başqa ukrainalı siyasiy mabuslarğa, bu cümleden, Sentsov ile beraberlikte yaqalanğan Oleksandr Kölçenkoğa ve ta saban ayı 19 kününden başlap açlıq tutqan faalci Volodımır Baluhqa diqqat çeke. Bundan da ğayrı, Avropa parlamenti Rusiye tarafından Qırımda halqara qanuniyetniñ bozuluvını, bu cümleden, ‘‘rusiye qanuniyetini zorbalıqnen yürsetüvni, regional havfsızlıq içün telüke doğurıp, Qırım yarımadasını küçlü askerleştirüvni, em de kütleviy ve muntazam tarzda ve esasen etnik ukrainalılarnıñ ve qırımtatarlarnıñ insan aqlarınıñ bozuluvını takbih etti’’.

‘‘Avropla parlamenti işğal etilgen Qırımda halqara qanuniyetniñ bozuluvını, bü cümleden, ‘‘rusiye qanuniyetini zorbalıqnen yürsetüvni, regional havfsızlıq içün telüke doğurıp, Qırım yarımadasını küçlü askerleştirüvini, em de kütleviy ve muntazam tarzda ve esasen etnik ukrainalılarnıñ ve qırımtatarlarnıñ insan aqlarınıñ bozuluvını takbih ete’’, – dep qayd etile rezolütsiyada.

Avropa parlamenti Avropa Birliginiñ insan aqları boyunca mahsus temsilcisini Qırım yarımadasında insan aqları saasında ve ükümetniñ nezaretinde olmağan Ukrainanıñ şarqındaki topraqlarda vaziyetke diqqat etmege çağırdı.