2018 senesi oraq (iyül) 25 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov ve Temsilcilikte halqara alâqalar hızmetiniñ hadimleri Kıyiv şeeri devlet memuriyetiniñ reis muavini Oleksiy Reznikov ile körüştiler. Körüşüv esnasında vaqtınca işğal etilgen Qırımdan memleket içinde köçken şahıslarnıñ içtimaiy qorçalavı ve olarğa Kıyiv şeerinde berilgen memuriy hızmetlerniñ keyfiyeti kibi meseleler muzakere etildi.

Subet devamında İzet Gdanov Temsilcilikniñ Ukraina Prezidenti bergen avaleler boyunca Ukrainanıñ nezareti altında bulunğan topraqlarda memleket içinde köçken şahıslarnıñ aq-uquqlarına ve qanuniy menfaatlarına riayet etüvnen bağlı faaliyeti aqqında tarif etti ve böyle şahıslarnıñ yerli akimiyet organları seviyesinde maddiy yardımnı aluv, emek bazarına, mektepten evel ve orta tasilge irişim kibi problemli meseleleri aqqında bildirdi.

Oleksiy Rezmikov ise öz nevbetinde memleket içinde köçken şahıslarğa şeer iş merkezleri vastasınen iş qıdıruv meselesine ziyade diqqat ayırmaq, vaqtınca yaşayış içün tamirlenecek meskenlerni qıdırmaq, qırımlılarnıñ cemaat birliklerini Kıyiv şeerindeki medeniy-maarif tedbirlerge celp etmek azır olğanını bildirdi. Şeer memuriyetiniñ reis muavini böyle tür Ukraina vatandaşlarına ziyadece teşebbüs kösterip, öz içtimaiy meseleleri ile olarnı çeze bilecek paytahtnıñ akimiyetine faal muracaat etmege tavsiye etti.