2018 senesi arman ayı (august) 20 künü Ukraina Prezidentiniñ Qırım MC Daimiy Temsilcisi Borıs Babin orta ve aliy oquv yurtlarınıñ tasil programmalarına Qırımnıñ tarihi, medeniyeti ve tamır halqları aqqında qoşma malümatlarnı kirsetüv algoritmleri boyunca iş muşaveresini keçirdi. Muşaverede Ukraina medeniyet Nazirliginiñ, Ukraina milliy hatıra institutınıñ, Qırımtatar Milliy Meclisiniñ, Vernadskiy adına Tavriya milliy universitetiniñ vekilleri iştirak etti.

Muşavere devamında orta ve alıy oquv yurtlarınıñ tasil programmalarına Qırımnıñ tarihi, medeniyeti ve tamır halqları aqqında qoşma malümatlarnı kirsetüv meselesi muzakere etildi. Bundan da ğayrı, ‘‘Qırım-Ukraina’’ tasil leyhası çerçivesinde faaliyetniñ ilk neticelerine yekün çekildi. Muşavereniñ neticesi olaraq, ‘‘Qırım-Ukraina’’ tasil merkezleri, Ukraina tasil ve ilim Nazirligi, Temsilcilik ve Ukrainanıñ vaqtınca işğal etilgen Qırım toprağında yaşağan abituriyentler arasındaki munasebetlerni eyileştirüv algoritmleri belgilendi, Ukraina mekteplerinde Qırımnıñ tarihi, medeniyeti ve tamır halqları aqqındaki malümatlarnı aydınlatuv mehanizmleri muzakere etildi.