2018 senesi arman ayı (august) 30 künü Ukraina Prezidentiniñ Qırım MC Temsilciliginde halqara alâqalar hızmetiniñ yolbaşçısı Yevgen Samuha televizion ve radio yayınlav meseleleri boyunca Ukraina  Milliy şurasınıñ azası Sergiy Kostinskiy ile körüşip, yerli televizion şirketlerniñ ve radio stantsıyalarnıñ qıta Ukrainadan vaqtınca işğal etligen Qırımğa ve Herson vilâyetiniñ cenübine yayınlavınıñ problemli meselelerini ve Qırım yarımadasından qomşu topraqlarğa сayrağan rusiye haber propagandasına qarşılıq kösterüvniñ tehnikiy tedbirlerni muzakere ettiler.

Sergiy Kostinskiy Qırım ile memuriy sıñırınıñ yañı televizion küleler ve başqa yayınlav vastalarnen tehnikiy donatıluvı aqqında bildirdi, hususan Çonğar köyünde qurulğan küleni, Qırımğa yayınlavnı kerçekleştirmek içün mütenasip ruhsetlerni qolaylaştırılğan usulnen alğan radio stantsıyalarnı ve televizion kanallarını qayd etti. Yevgen Samuha Ukrainanıñ radio dalğalarını qanunsız şekilde işletüvnen, yarımadada rusiye propagandası içün televizion ve radio yapılarınıñ qurucılığınen bağlı olğan Qırımdaki işğalci akimiyetiniñ, yerli ve rusiyeli qurulışlarnıñ bütün vekâletli şahıslarnı belgilemek ve mesüliyetke çekmek, olarğa qarşı sanktsıyalarnı işletmek kerek olğanına, em de rusiye propagandasına qarşılıq köstermek maqsadınen Mahsus devlet alâqanıñ işletilüvine diqqatnı celp etti.

Taraflar ğayretlerini birleştirmege ve vaqtınca işğal etilgen Qırımğa televizion ve radio yayınlav saasında içki devlet siyasetiniñ planlaştırılğan tedbirlerniñ semereligini nezaret etmek maqsadınen Temsilcilik ile Milliy şuranıñ umumiy tedbirlerini belgilemege añlaştılar.