2018 senesi berim ayı (sentâbr) 10 künü Ukraina Prezidentiniñ Qırım MC Daimiy Temsilcisi Borıs Babin ve onıñ Birinci muavini İzet Gdanov Ukrainanıñ vaqtınca işğal etilgen Qırım toprağından istilânıñ devam etmesine qarşılıq kösterüv, Qırımda Ukraina devletiniñ, uquqiy şahıslarınıñ ve vatandaşlarınıñ aq-uquqlarını qorçalav boyunca 2018-2019 seneleri içün acele tedbirler Planını yerine ketirüv olaraq, Ukrainanıñ vaqtınca işğal etilgen Qırım toprağına sanitar-epidemiologik vaziyet ve tıb saasında başqa meseleler, bu cümleden, yarımadanıñ şimalinde yüz bergen ekologik buhran boyunca iş keñeşini keçirdiler.

Keñeşte Ukraina sağlıq saqlav Nazirliginiñ, aşayıt mallarnıñ havfsızlığı ve istimalcılarnı qorçalav boyunca Ukraina Devlet hızmetiniñ, tıbbiy vastalar ve uyuştırıcılarnı nezaret etüv boyunca Ukraina devlet hızmetiniñ vekilleri de iştirak etti. Ukrainanıñ vaqtınca işğal etilgen Qırım toprağında yaşağan ealini çeşit türlü tedaviylev vastalarnen temin etüv, Qırımda kerçek epidemiologik vaziyetni ve işğalci akimiyetke boysunğan müessiseler tarafından Ukraina vatandaşlarına berilgen tıbbiy yardımnıñ kerçek seviyesini belgilev muzakere etildi.

Bundan da ğayrı, Şimaliy Qırımda yüz bergen ekologik buhranınıñ kerçek vaziyetini, Qırım sakinlerine ve Herson vilâyetiniñ qomşu topraqlarına tesirini belgilev muzakere etildi. Sağlıq saqlav tertibatınıñ islâatı şaraitlerinde qırımlılarğa tıbbiy yardımnıñ berilüvini teşkil etüv muzakere etildi. Tıbbiy tasil bergen yurtlarnı ‘‘Qırım-Ukraina’’ leyhasına semereli şekilde celp etüv de muzakere etildi.

Muşavereniñ neticesi olaraq, onıñ iştirakçileri öz vekâletleri çerçivesinde areketlerini uyğunlaştırdılar, ealiniñ sağlığını saqlav saasında mütenasip vazifelerni belgilediler. Acele sürette çezilecek meseleler arasında ekologik buhran zonasında yaşağan ya da bulunğan şahıslarğa keyfiyetli tıbbiy tavsiyelerni berüv, KÇNN-da tıbbiy personalnıñ ve ilâclarnıñ daimiy şekilde bulunuvı belgilendi.