2018 senesi berim (sentâbr) ayı 30 künü Temsilcilikteki haber-talil hızmetiniñ reberi Svitlana Tkaçenko yerli öz-özüni idare etüv organlarnıñ ve icra akimiyetniñ daveti ile Melitopol şeeriniñ 234-yıllığı munasebetinen keçirilgen tantanalı tedbirlerde iştirak etti.

Al-azırda Melitopol faal inkişaf ete, sanaiy imkânlarını kenişlete, amma onıñ sakinleri Qırımğa alıp barğan yolda yerleşken topraqlarınıñ zengin tarihına ürmet ile yanaşalar.

Şeer künini qayd etüv çerçivesinde ‘‘İşanç. Ümüt. Sevgi’’ milliy medeniyetler gençler festivali ötkerildi, Melitopol şeerinde yaşağan on eki milliy cemiyet şeerniñ musafirlerini çeşit türlü vastalarnen milliy medeniyetlerinen tanıştırdı.

Svitlana Tkaçenko qayd etkeni kibi, qırımtatar milliy ananelerini taqdim etüv pek meraqlı edi. Ukrainanıñ bu tamır halqınıñ vekilleri Melitopol şeerinde ve rayonında yaşap, sovet akimiyeti tarafından yapılğan cinaiy sürgünliklerge ve ayrımcılıqqa, em de zemaneviy Qırım işğaline baqmadan, öz medeniyetini qorçalamağa devam eteler ve qırımtatar tilini ile kerçek Qırım tarihini daa populâr yapmaq içün çalışalar. Qırım karayimleriniñ tarihı da pek meraqlı, olarnıñ cemiyeti de Melitopol vilâyetinde yaşay.