2018 senesi ekim (oktâbr) ayı 12 künü Temsilcilikteki halqara alâqalar hızmetiniñ reisi Yevgen Samuha ‘‘Ukrainalılarnıñ sotsial-demokratiyağa munasebetleri’’ mevzusında Ukrainada Fridrih Ebert adına Fondunıñ qol tutuvı ile Gorşenin insitutı tarafından keçirilgen umumukrain içtimaiy tedqiqatnıñ neticelerini taqdim etüvde iştirak etti.

Tedbirde Ukrainada Fridrih Ebert Fondu Temsilciliginiñ müdiri Marsel Ryotig, fondnıñ Merkeziy ve Şarqiy Avropada fırqalar meseleleri boyunca mesleatçısı Konrad Golota, halq deputatları, ekspertler ve alimler iştirak etti.

Temsilcilikniñ hadimi qayd etkeni kibi, Ukrainadaki içtimaiy problemalarnıñ bir qısımı Qırım ile Aqyardan başlanğan rusiye istilâsınıñ neticesidir ve bu Avropağa yönelişini yañlış dep adlandırğan populistlerniñ çoqlaşqanına ketirdi. Amma akimiyetniñ başında ya da iqtidardaki koalitsiyada sotsial-demokratlar olğan AB memleketleriniñ ekseriyetinde bereket, uquq ve demokratiya, kerçek içtimaiy dialog üküm sürmekte. Ukrainanıñ bu Avropa klubına qoşuluvı mıtlaqa Qırımnıñ ve Aqyarnıñ işğalden azat etilüvine ketirir.