Ukraina Prezidentiniñ Qırım MC Temsilciligi 2017-2018 seneleri devamında, başqa vekâletli organlar ile beraberlikte, çoq kereler rusiye istilâsı, vaqtınca Qırım işğali ve Azaq deñizini arbiyleştirüv şaraitlerinde 1993 senesi berim (sentâbr) ayı 14 künü imzalanğan Ukraina-Rusiye idareler arası Añlaşmanıñ devam etilüvi, Azaq deñizinde balıqçılıq meseleleri boyunca Komissiya qararlarınıñ yerine ketirilüvi ve 2014-2017 seneleri devamında işbu Komissiyanıñ protokollarını qabul etüvniñ ameliy neticeleri meselelerini kötergen edi.
Komissiyanıñ 2017 senesi devamında faaliyeti qaparcılıq ve havfsızlıq telükelerini doğurğanı aqqında defalarca mütenasip uquq qorçalav organlarğa ve bu cümleden, 2018 senesi qural (mayıs) ayındaUkraina havfsızlıq Hızmetine ve Qaparcılıqqa qarşı Ukraina milliy bürosına haber etildi. Ukraina çetel işler Nazirliginiñ, Ukraina adliye Nazirliginiñ ve Devlet balıqçılıq agentliginiñ vekâletli şahısları defalarca em muşaverelerde, em yazılı şekilde Añlaşmanı ve Komissiyanıñ faaliyetini devam ettirmek kerek kibi fikirlerni tasdıqlamayıp beyan etti. Bu vaziyetni diqqatqa alaraq, Daimiy Temsilciniñ Birinci muavini Komissiyanıñ 2018 senesi ekim (oktâbr) ayı 23-25 künlerine Kıyiv şeerinde planlaştırılğan XXX toplaşuvına yollanıldı.
2018 senesi berim (sentâbr) ayı 27 künü Devlet balıqçılıq agentligine Temsiclilik Komissiya XXX toplaşuvınıñ kün tertibine aşağıdaki meselelerni kirsetmege yazılı şekilde teklif etti:
– 2014 senesinden başlap, Qırım yarımadasında bulunğan hocalıq subyektlerine Azaq deñizi suvlarında yaşağan biologik resurslarnıñ avlanmasına berilgen kvotalarnıñ miqdarı ve sebebi;
– Azaq deñizinde ve Keriç boğazında Ukraina bayrağı altında yaldağan balıqçı gemilerni kütleviy şekilde teşkerüv ve yaqalav, RF mahsus havfsızlıq Hızmetiniñ sıñır hızmeti vekilleri tarafından ukrain balıqçılarnı hırsızlanmasınıñ sebepleri.
2018 senesi ekim ayı 10 künü keçirilgen muşaverede Devlet balıqçılıq agentligi yuqarıda qayd etilgen meselelerni Komissiyanıñ XXX toplaşuvı kün tertibine kirsetmekni red etti. RF vekilleri ile umumiy tantanalı ve eglenceli tedbirlerni Komissiyanıñ XXX toplaşuvı kün tertibine kirsetüv Temsilcilik ile uyğunlaştırılmadı.
Böyle şaraitlerde, Azaq deñizinde Ukraina bayrağı (qaydı) altında yaldağan gemilerniñ Rusiye tarafından devamlı ve qanunsız alda toqtatıluvını, tosmenge tutuluvını ve teşkerilüvi, RF silâlı küçleri tarafından Azaq deñizinde ve Sivaş suvlarında ukrain balıqçılarnı hırsızlamaq, qanunsız alda olarnı techizatlarından ve tutulğan balıqtan marum etmek intıluvlarını, Sivaş ve Azaq deñizi etraflarında RF gemileriniñ ve yer üstü quvetleriniñ arrtırıluvını, Ukraina tarafından devlet seviyede Azaq deñizinde ve Keriç boğazında istilâcı devletniñ tesirini arttıruvına qarşılıq kösterüv tedbirlerniñ keçirilmesini, Devlet balıqçılıq agentligine ve vekillerini Komissiya terkibine yollağan başqa Ukraina devlet organlarına Temsilcilik tarafından berilgen tekliflerniñ esassız red etilüvini diqqatqa alaraq, Temsilcilik evelden yazılı şekilde Komissiyanıñ XXX toplaşuvında Ukrainanıñ devlet menfaatlarına qarşı çıqacaq areketlerden vazgeçmege teklif etti.
Azaq deñizinde balıqçılıq meseleleri boyunca Komissiyanıñ XXX toplaşuvında 2018 senesi ekim ayı 23 künü Daimiy Temsilciniñ Birinci muavini İzet Gdanov bir kere daa yuqarıda qayd etilgen, Komissiyanıñ vekâletleri çerçivesinde bulunğan ve acele sürette muzakere etilüvini ve çezilüvini talap etken meselelerni tekrarlardı. Bundan da ğayrı, Komissiya aqqında Qaideler boyunca Komissiyanıñ azası olğan Birinci muavin Rusiye tarafından Azaq deñizini arbiyleştirüv ve onıñ ayrı rayonlarını qapatuvnıñ Añlaşma ile kefil etilgen balıqçılıq azatlığına tesir etüv, istilacı devletniñ eyeti terkibinde Qırımnı qanunsız alda ziyaret etken ve Qırımdaki hocalıq obyektlerniñ rusiye işğalci teşkilâtlarınıñ menfaatına ayırmağa yardım etken şahıslarnıñ bulunuvı, Komissiyada bulunğan ayrı hocalıq strukturalarnıñ vaqtınca işğal etilgen Donetsk vilâyetinde qaydqa alınuv kibi meselelerni köterdi. Komissiya azaları yuqarıda qayd etilgen meselelerni körmemezlikke urdı.
Böyle şaraitlerde Komissiyanıñ faaliyeti Ukrainanıñ milliy menfaatları içün büyük telükeler doğurğanını, rusiye istilâsına qarşılıq kösterüv ve Qırımnı işğalden azat etüv boyunca tedbirleriniñ semereligini tüşürgenini qayd etmege lâzimdir.
Yüz bergen vaziyette Temsilcilik öz vekâletleri çerçivesinde Ukraina devlet menfaatlarını ve insan aqlarını qorçalavı içün qolundan kelgenini yapmağa devam etecektir.