2018 senesi boş ay (noyabr) 22 künü Ukraina Prezidentiniñ Qırım MC Daimiy Temsilcisi Borıs Babin Kanadanıñ Ukrainada Fevqulâde ve Vekâletli Elçisi Roman Vaşçuk ile iş körüşüvni keçirdi.

Daimiy Temsilci muntazam şekilde Ukrainanıñ egemenligine ve topraq bütünligine qol tutqan Kanadağa öz minnetdarlığını bildirip, Elçini devlet organı olğan Temsilcilikniñ mevamı ve memleket içinde köçken, ya da Qırımda yaşamağa devam etken Ukraina vatandaşlarnıñ bütün Ukraina topraqlarında esas aq-uquqlarına riayet etilmesi oğrunda vekâletleri ile tanıştırdı, Temsilcilikniñ esas yönelişleri ve eñ yaqın kelecekte birinci nevbetteki vazifelerini tarif etti.

Borıs Babin siyasiy sebepten Ukraina vatandaşlarnıñ taqip etilüvine alâqaları olğan şahıslarğa qarşı milliy seviyede sanktsiyalarnıñ semereligini arttırmağa ve ğarbiy memleketlerde olarğa qarşı sanktsiyalar kirsetmege kerek olğanını qayd etti. Sanktsiyalar qullanuvına ameliy misaller ketirdi, Ukrainada istilâcı devletni temsil etken şahıslar taraftan açılıp, Temsilcilikniñ faaliyeti ile bağlı olğan mütenasip mahkeme davalarnıñ ketişatını talil etti ve sanktsion siyasetini semereli şekilde qullanuvnı ve işbirlik imkânlarnı muzakere etti. Bundan da ğayrı, Daimiy Temsilci kündelik qanun yaratıcılıq faaliyeti ve Herson vilâyetiniñ vaqtınca işğal etilgen Qırım cıvarındaki rayonlarda Memuriy hızmet merkezlerni teşkil etüv ve donatuv oğrunda Temsilcilik yapqan adımlar, mevcut olğan problemalarnı çezmek içün halqara tehnikiy yardımnı celp etmege kerek olğanı aqqında haber etti. Körüşüvniñ neticesi olaraq, taraflar kelecekteki işbirlik aqqında añlaştılar.