2018 senesi ilk qış (dekabr) ayı 21 künü ”Vaqtınca işğal etilgen Qırımda insan aqlarınıñ qorçalanmasını temin etici mehanizm olaraq şahsiy sanktsiyalarnı qullanuv” mevzusında tögerek masada çetel elçiliklerniñ vekilleri Rusiye Federatsiyasına semereli tesir etüv vastalar olaraq öz devletlerindeki ”Magnitskiy aktınа” benzer qanunlarnı taqdim ettiler.

Tögerek masa iştirakçileri işbu qanunlarnıñ terkiplerini, maqsatlarını ve qabul etilmesiniñ sebeplerini, çetel memleketlerde olarnı qullanuv tecribesini ve neticelerini, em de vaqtınca işğal etilgen Qırımda insan aqlarını bozuv meselesinen bağlı olaraq, ”Magnitskiy aktına” benzer qanunlarnı meydanğa ketirüv ve qullanuvnıñ istiqbalini muzakere ettiler.

Qırımda işğalci akimiyetniñ temsilcileri tarafından insaniyetlikke qarşı cinayetler ve cenk cinayetleri boyunca Halqara cinaiy mahkeme Pokurorı ofisiniñ fikiri ayrıca talil etildi.

Tedbir Ukraina çetel işler Nazirliginiñ, Qırımtatar resurs merkeziniñ, Qırımtatar Milliy Meclisiniñ ve T.G. Şevçenko adına Kıyiv milliy universitetindeki halqara munasebetler İnstitutınıñ umumiy teşebbüsi ile keçirildi.