2018 senesi ilk qış (dekabr) ayı 22 künü BMT Baş Assambleyası Ukraina ile 29 müellifdeş devletler tarafından azırlanğan ”Ukrainanıñ Qırım Muhtar Cumhuriyetinde ve Aqyar şeerinde insan aqları saasındaki vaziyet” adlı rezölütsiyanı qabul etti.

BMT yanındaki Ukrainanıñ Daimiy Temsilciligi haber etkenine köre, vesiqada aşağıdaki maddeler tarif etildi:

– Qırım toprağınıñ küç vastasınen zapt etilüvi tanılmay ve işğal etilgen topraqlarnıñ qaytarıluvı talap etile.

– Siyasiy sebeplerden Ukraina vatandaşlarınıñ taqip etilüvi takbih etile, vaqtınca işğal etilgen Qırımda ve RF-da tutulğan bütün ukrainalılarnı azat etmege çağırıla.

– Oleg Sentsov, Volodımır Baluh, Emir-Üseyin Kuku siyasiy mabuslar olaraq tanıla.

– RF Qırım ealisini zorbalıqnen rusiye vatandaşlığına keçirgeni, onı öz arbiy ameliyatlarına celp etkeni ve qanunsız saylav kampaniyalarını keçirgeni içün takbih etile.

– RF-dan halqara tıbbiy teşkilâtlarını temsil etken mustaqil ekimler ve ukrain vekâletli şahısları içün rusiye topraqlarında ve Qırımda qanunsız alda tutulğan ukrain vatandaşlarına irişim bermege talap etile.

– RF Qırımda söz ve tınç toplaşuvlar serbestliklerine qarşı cezalavlardan vazgeçmege, işğalni tanımağanlarnıñ taqip etilüvini toqtatmağa çağırıla.

– Halqara teşkilâtlardan ve BMT mahsus idarelerinden resmiy vesiqalarında ukrain yarımadasını ”Rusiye Federatsiyası tarafindan vaqtınca işğal etilgen Qırım Muhtar Cumhuriyeti ve Aqyar şeeri (Ukraina)” olaraq qayd etmege talap etile.

– BMT Baş kâtibine işbu rezölütsiyanı yerine ketirüv boyunca esabat ve nevbetteki areketler boyunca tevsiyeler azırlamağa avale etile.

Rezölütsiyağa 65 memleket qol tuttı, 27 qarşı çıqtı.