2019 senesi çiçek (aprel) ayı 22 künü Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini İzet Gdanov insan aqları boyunca BMT NM Odesadaki ofisiniñ Başlığı D. Kaniffe ve insan aqları boyunca mütehassısı V. Hilko ile iş körüşüvini keçirdi.

Körüşüv esnasında Birinci muavin vaqtınca işğal etilgen Qırımda yaşap, adliy ve malümat ceetten qol tutuvğa, resmiy vesiqalarını elde etüvde, aq-uquqlarını yerine ketirüvde yardımğa muhtac olğan Ukraina vatandaşlarına hızmet etken Temsilcilikniñ faaliyeti ile tanıştırdı.

Вu munasebetnen Temsilcilik yerli icra akimiyet organlarınen işbirlikte Herson vilâyetinde ve hususan memuriy sıñırğa yaqın olğan rayonlarda memuriy hızmet merkezlerini teşkil etkeni qayd etildi.

Ayrıca RF işğalci akimiyetiniñ qanunsız ve aqılsız areketleri neticesinde Ukrainanıñ vaqtınca işğal etilgen Qırım toprağında yüz bergen iqtisadiy ve ekologik vaziyet muzakere etildi. Qanunsız taqip etüv, qorqutuv, qırımtatarlarğa, etnik ukrainlerge qarşı basqı, gibrid sürgün etüv, halqara uquqnı bozuv olaraq, Rusiye vatandaşlarınıñ vaqtınca işğal etilgen Qırımğa köçürilüvi kibi adiselerge diqqat etildi.

İzet Gdanov gibrid cenki şaraitlerinde vaqtınca işğal etilgen yarımadada Ukraina vatandaşlarına qarşı istilâcı devletniñ tecavüziy qanunsız areketleri aqqında kerçek haberlerni talil etüvnen ve aydınlatuvnen oğraşqan nezaret etici missiyalarnıñ emiyetini qayd etti, bu malümat kelecekte halqara mahkemelerde isbatlar olaraq işletilecektir.

”Vaqtınca işğal etilgen Qırımnı eñ yaqın vaqıtta azat etmek maqsadınen beraberlikte yapılğan areketlerimiznen Rusiye istilâcısına siyasiy-diplomatik ve iqtisadiy basqını arttırmalımız”, – dep ayttı o, halqara nezaret etici missiyasınıñ vekillerine muracaat eter eken.

Körüşüvniñ soñunda taraflar gumanitar saada kelecekteki munasebetlerini ve işbirliklerini planlaştırdı.