Ürmetli vatandaşlar!

Bügün biz Ekinci cian cenkiniñ öldürici ateşinden keçken bütün esli-başlı insanlarnı ğurur ile alğışlaymız.

Natsistler ve olarnıñ ortaqları üzerinde ğalebe qazanuvğa muim issesini qoşqan ukrain halqınıñ büyük qaramanlığı ve qurbanları tarih ve halqara cemiyet tarafından tanılğandır.

Pek çoq azap çekken toprağımızda duşmannıñ saylanğan arbiy bölükleri darma-dağın etildi, cenkniñ qadırı belgilendi ve Gitlerge qarşı küreşken birlikniñ umumiy ğalebeleri başlandı.

Bu ğalebege berilgen canlı fiyat arasında – cebeden, toplama lagerlerinden, ağır işlerden qaytmağan, qurşunğa tizilgen, qıynalğan, cenkten sonraki yıllarda yaralarından, açlıqtan ve cezalavlardan sebep vaqıtsız ölgen vatandaşlarımıznıñ ömürleridir.

Bütün elâk olğanlarnıñ ruhları şad olsun.

Natsizm üzerinde ğalebe qazanğanlarnıñ torunları ellerine silâ alıp, al-azırda beş yıl devamında ukrain halqınıñ serbestligini ve medeniy seçimini Rusiye istilâsından qorçalay.

Ukrainanıñ şarqıy sıñırları tınç ve birleşken Avropanıñ birinci qalesine çevirildi.

Eminim ki, demokratik milletler ile beraberlikte biz devletimizniñ egemenligi ve topraq bütünligi içün küreşte ğalebe qazanırmız, Avropa qıtasında daa bir kütleviy cenkniñ tekrarlanmasına yol bermemiz.

Aziz cenk veteranları!

Sizni can-yürekten bayramıñız – Ğalebe künü ile hayırlayım.

Cenkâver qaramanlığıñız ve tınç emegiñiz içün teren minnetdarlığımnı bildirem.

Özüñizge, tuvğan ve yaqınlarıñızğa qaviy sağlıq, aileviy baht ve bereket tileyim.

Ürmetli Ukraina Silâlı Quvetleriniñ ve diger arbiy bölükleriniñ askerleri!

Bütün halqımıznıñ qoltutuvı ile vatanperverligiñiz, fedakârlığıñız sayesinde duşmanımız toqtatıldı, ana toprağımıznıñ esas qısımı azat etildi. Ukraina öz qaramanlarınen ğururlana.

Ukraina halqı adından memleketimizni işançnen qorçalağanıñız içün minnetdarlıq bildirem. Epiñizge tınçlıq, amanlıq ve yañı ğalebeler tileyim.

Natsizm üzerinde ğalebe künü ile hayırlayım!

Ukrainağa şan-şüretler olsun!

Petro POROŞENKO