2019 senesi oraq (iyül) ayı 16 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Qırım Muhtar Cumhuriyetiniñ prokurorı Gündüz Mamedov ile iş körüşüvini keçirdi.

Eki idareniñ vekilleri işbirlik ve vaqtınca işğal etilgen Qırım MC yüz bergen insan aqları bozuluvlarına, bu cümleden, işğalci akimiyetniñ vekilleri tarafından yapılğan cenk cinayetlerine ve insaniyetke qarşı cinayetlerge cevap berüv, memleket içinde köçken şahıslarnıñ aq-uquqlarını qorçalav ile bağlı qanun leyhalarını ve Ukraina Prezidentiniñ fermanlarını azırlav kibi meselelerni muzakere ettiler.

Anton Korınevıç prokuratura ve muhtariyetniñ uquq qorçalav organları tarafından vaqtınca işğal etilgen Qırım MC-de ve Aqyar şeerinde kütleviy şekilde yüz bergen insan aqlarınıñ bozuluvına nasıl cevap berilgeninen ve bozulğan aq-uquqlarınıñ ğayrıdan tiklenüvi ve qabaatlı şahıslarnıñ mesüliyetke çekilüvi içün semereli işbirlik şekillerinen meraqlandı.

Taraflar Halqara cinaiy mahkemeniñ adliyesini tanımağa istegen Ukrainanıñ arizasına binaen işbirlik aqqında bir fikirge keldiler, Ukraina cinaiy kodeksinde halqara cinayetlerni kerekli şekilde cezalamaq, Halqara cinaiy mahkemeniñ Roma nizamnamesini tanımaq, sanktsion qanuniyeti ile vaqtınca işğal etilgen topraqlar sakinleriniñ ve memleket içinde köçken şahıslarnıñ aq-uquqlarına ve qanuniy menfaatlarına riayet etüv maqsadınen qanuniy vastalarnı doğrultmaq kerek olğanı aqqında añlaştılar.