Ukraina Prezidenti Volodımır Zelenskiy, Rusiyeni öz areketleri içün mesüliyetke çekecek bir vasta tapılacağında emindir. Türkiye bu maqsatqa irişmege yardım etecek ortaqlarımızdan biri, dep saya devlet Başlığı.
“Rusiyege halqara uquqnı ürmet ettirecek, regionımızğa tınçlıq ve istiqrarlıqnı qaytaracaq, qırımtatarlarnıñ aq-uquqlarını qorçalaycaq ve Kremlniñ siyasiy mabuslarını azat ettirecek bir yolnı mıtlaqa beraberlikte taparmız”, – dep qayd etti Prezident Recep Tayıp Erdoğan ile umumiy matbuat konferentsiyası devamında Volodımır Zelenskiy.
”Eminim ki, Ukraina ile Türkiyeniñ umumiy ğayretleri sayesinde Qaradeñiz regionındaki ve Qırımdaki vaziyetlerni eyilikke çevirirmiz”, – dep qoştı Prezident.
Onıñ aytqanına köre, vaqtınca işğal etilgen Qırımda devam etken arbiyleştirüv telükesi, yarımadada insan aqlarınıñ bozuluvı ve qırımtatarlarnıñ taqip etilüvi Türkiye Prezidenti ile bügünki muzakereleriniñ esas mevzularından biri edi.
”Eminmiz ki, Rusiyeniñ halqara sanada mesüliyetsiz ve cezalanmağan areketlerine niayet adaletli cevap bermek kerek. Çünkü bügün bu belâ Ukrainanıñ qarşısında tursa, yarın regionnıñ bütün devletleri içün büyük bir felâketke çevirilir”, – dep qayd etti devlet Başlığı.
Volodımır Zelenskiyniñ aytqanına köre, Ukraina halqara ortaqları ile beraberlikte Donbasta diplomatik yolnen barışıqnıñ ğayrıdan tiklenüvi içün qolundan kelgenini ve atta kelmegenini yapmağa devam ete, soñki künlerde olıp keçken vaqialar ise asılında cenkniñ bitmesini kimler istegenini tasdıqladı. Misal olaraq, arman (avgust) ayı 6 künü ”ötmekli” ateşni toqtatuvğa baqmadan, duşman ateş açtı ve neticede dört ukrain arbiysi elâk oldı. Aynı vaqıtta Ukraina tarafı ateşni toqtatuv nizamına riayet etmege devam etti.
”Ukraina şarqındaki soñki vaqialardan soñ kim kerçekten de tınçlıqnı arzu etip, onıñ tiklenmesi içün er şey yapqanına iç kimseniñ subesi qalmadı”, – dep qayd etti o.
Prezident, Ukraina öz strategik ortağı Türkiye Cumhuriyeti ile munasebetlerine yüksek qıymet keskenini aytıp, Prezident Erdoğanğa Ukrainanıñ topraq bütünligine ve mustaqilligine deñişmegen şekilde qol tutqanı içün öz minnetdarlığını bildirdi.
”Er şeyni kerçek adınen, bu cümleden, Qırımnıñ Rusiye tarafından zap etilmesini işğal olaraq adlandırğanıñız içün teşekkürimni bildirem”, – dep ayttı devlet Başlığı.
Bundan ğayrı haber etkenine köre, o, Türkiye tarafını Ukraina şarqındaki infraterkip obyektleriniñ ğayrıdan tiklenüvinde iştirak etmege davet etti. “Küzde Mariupolde Donbasnı ğayrıdan tiklev boyunca keçirilecek Halqara forumda Türkiye tarafınıñ faal iştirak etmesini bekleymiz”, – dep qayd etti Volodımır Zelenskiy.
Recep Tayıp Erdoğan öz nevbette Turkiye Qırımnıñ qanunsız alda ilhaq etilmesini tanımağanını ve tanımaycağını tasdıqladı. Bundan qayrı, Qırımda qırımtatarlarnıñ aq-uquqlarınıñ ve menfaatlarınıñ qorçalanması, milliy mensübiyetleriniñ saqlanması, öz vatanlarında serbest yaşay bilmeleri onıñ devleti içün ilk nevbetteki mesele olmağa devam etecegini qayd etti.
”Donbastaki davanıñ tez vaqıtta bitmesini isteymiz. İnanamız ki, o, halqara uqquqa ve Ukrainanıñ topraq bütünligine riayet etip, barışıq yolunen çezilir. Minsk muzakerelerine ve Türkiye diplomatları yolbaşçılığındaki AHİT Mahsus nezaret etici missiyasınıñ faaliyetine qol tutamız”, – dep qoştı Türkiye Prezidenti.
Menba: https://www.president.gov.ua/news/mi-razom-obovyazkovo-znajdemo-shlyah-yakij-zmusit-rosiyu-pov-56765