Ukraina Prezidentiniñ bala aqları boyunca vekâletlisi Mıkola Kuleba Ukraina Prezidentiniñ Qırım MC Daimiy Temsilcisi Anton Korınevıç, Qırım MC prokuror muavini Anatoliy Kotsura ve Qırım prokuraturasınıñ prokurorları ile iş körüşüvlerini keçirdi.
Körüşüvler esnasında bala aqlarını qorçalav ile bağlı problemli meseleler muzakere etildi. Bu cümleden, olarğa Ukraina vatandaşı pasportını berüv, öksüz, ana-babadan marum qalğan, Ukraina akimiyet organları tarafından tayin etilgen vasiyleri olmağan balalarnı sıñırdan keçirüv ve Qırım MC yaşağan balalarnıñ menfaatlarını ukrain mahkemelerinde qorçalav aqqında laf yürsetildi.
”Qırım Muhtar Cumhuriyetiniñ topraqlarında 450 biñge yaqın balamız yaşamağa devam ete. Bu balalarnıñ esas qanun boyunca aq-uquqlarını yerine ketirüv meselesi al-azırda çezilmedi. Yazıqlar olsun ki, icra akimiyet organı olaraq bala aqlarını qorçalav meselesinen oğraşacaq İçtimaiy siyaset nazirligi vaqtınca işğal etilgen topraqlarda bulunğan balalarnıñ vaziyetlerini körmemezlikke urmaqta. Fikirimce, yañı ükümetni teşkil etmekten soñ biz deral bu meselelerniñ çezilüvinen oğraşmalımız”, – dep qayd etti Mıkola Kuleba.
Bala aqları boyunca vekâletli vaqtınca işğal etilgen topraqlarda yaşağan balalarnıñ problemalarını kompleks sekilde çezilmesi içün Nazirler Şurasından İçtimaiy siyaset nazirligi, Adliye nazirligi, Devlet sıñır hızmeti, Qırım MC-de yaşağan insanlarnıñ aqlarını qorçalav ile oğraşqan cemaat teşkilâtları vekilleriniñ iştiragi ile iş gruppasını teşkil etecegini bekley.