Ukraina akimiyeti qırımlılarnen, olarnı qorçalamaq maqsadınen yapılğan areketler aqqında qonuşmalı, onıñ içün vaqtınca işğal etilgen yarımada yayınlavlav ile temin etilmeli, Kıyiv şeerinde ”Age of Crimea 2020” forumınıñ açılış tedbiri esnasında dep qayd etti Prezident Volodımır Zelenskıy.
”Qırımğa yayınlavnı teşkil etüv müimdir. Anda yaşağan adamlar zemaneviy Ukraina aqqında kerçek haberlerge muhtaçlar. ATR kanalı da öz yayınlavını devam eteceginde de eminlik bildirem, onı iç kimse devlet qol tutuvından marum etmez. Bu mesele eñ yaqın vaqıtta çezilir”, – dep bildirdi Volodımır Zelenskıy.
Prezident qayd etkenine köre, ukrain akimiyeti Qırım üzerinde mavılı-sarılı bayraqnıñ kene de yelpiremesi içün qolundan kelgenini yapacaq. Amma bügünde-bügün yapıla bilecek ve yapılması kerek olğan şeyler bar.
”Birinciden, Qırımda yaşağan, ya da Qırımda qayd etilgen vatandaşlarğa qol tutuv”, – dep ayttı Devlet başlığı.
Prezident, evelki yıllar devamında akimiyet, er fırsattan faydalanıp, Qırımnıñ Ukrainağa ait olğanını ayta edi, asılında ise qırımlılar doğuv aqqında şeadetnamelerini mürekkep mahkeme ceryanı neticesinde alalar, bankta esap açamaylar ve kredit alıp olamaylar.
”Fikirimce, Ukraina içün bu, masqaralı ve lüzümsiz davranıştır. Altı yıl devamında mevcüt olğan meseleler tek şimdi ükümet tarafından faal şekilde çezile”, – dep qayd etti Volodımır Zelenskıy.
Prezidenniñ aytqanına köre, vaqtınça işğal etilgen Qırım ile sıñırda kiriş-çiqış nezaret noqtalarından (KÇNN) keçken qırımlılar ne dayın Ukrainanı körgenleri de pek müim.
”Oñaytlı, havfsız, yarıq, yolları tegiz ve, bağışlañız, kenefleri çalışqan bir devlet olmalı. Onıñ içün oñaytlı KÇNN-nıñ abadanlaştırıluvına biz böyle emiyet bere edik. Ve biz bunı becerdik. Aynı vaqıtta, bu pek güzel tesisler tek vaqtınca qurulğanını hatırlatmağa isteyim. Bundan ğayrı, devletimiz SOCAR şirketi ile beraberlikte bu yılnıñ soñuna qadar Çonğarda vatandaşlarğa hızmet etecek büyük merkez açacaq. Anda tam manada Memuriy hızmet merkezi, raatlıq yeri ve başqa müim vastalar olacaqtır”, – dep qayd etti Prezident.
Devlet başlığınıñ qayd etkenine köre, bundan ğayrı, o, Qırımdan memleket içinde mecburen köçken vatandaşlar içün 500 daireniñ qurulması aqqında Türkiye ile añlaştı.
”Eñ yaqın künlerde Türkiye tarafı Ukrainağa qurucılıq içün yer saylamaq maqsadınen kelecektir”, – dep qayd etti Devlet başlığı.
Bundan ğayrı, Qırımda ukrain gençleri içün küreşmelimiz, bu cümleden: olar içün tasil hızmetlerge irişimni qolaylaştırmaq ve olarğa Ukrainada yaşayışlarını qurmağa yardım etmek kerekmiz.
Prezidentniñ aytqanlarına köre, keçici devirde adliye ve Ukrainanıñ tamır halqı olğan qırımtatarlarğa dair tarihiy adaletniñ ğayrıdan tiklemnesi üzerinde iş devam etmektedir.
Menba: Ukraina Prezidentiniñ İnternette resmiy temsilciligi