‘Saba saat dört… Qapı qaqıldı… Azırlanuv içün 15 daqqa…”

1944 senesi mayıs 18 künü er qırımtatar qorantasına kelgen facianı başından keçirgenlerniñ bütün hatırlavları bu sözlernen başlana. 76 yıl evelsi Qırım yarımadasınıñ tamır halqı sürgünlikke oğratıldı.

Bügün, qırımtatar halqınıñ genotsid qurbanlarını añuv Kününde, biz biñlernen insanlarnı yoq etken, taqdirlerni yaralağan deşetli cinayetni hatırlaymız. Adamlarnı vagonlarğa oturtıp, ana topraqlarından biñlernen kilometr uzaqlığına yiberdiler. Pek çoq qırımtatar askeri Berlingece barıp, cenkten medaller ile qayttı. Ve evlerini boş alda kördi. Ekseriy allarda olarğa qorantaları qayda yollanğanı aqqında aytılmadı.

O künniñ saari qırımtatar halqınıñ ömürinde facia olaraq adlandırıldı.

Tek 40 yıl soñra olar evlerine qaytıp oldı. Bütün dertleri aman-aman keride qaldı. Amma 2014 senesi Qırım işğal etilgen soñ pek çoq qırımtatar ve ukrain millet vekili kene öz topraqlarını terk etmege mecbur oldı. Qalğanlar ise tintüvlerge, basqığa ve azatlıqtan marum etüvge oğratıla.

Künlerniñ birinde Qırım ille Ukrainağa qaytacağına inanamız. Qırımtatarlar ve ukrainler öz evlerine qaytır, bir masa başına oturıp, ”Bizim ve siziñ azatlığıñız içün!” dep aytır. Bizim ve siziñ azatlığıñız içün!

Bügün Ukraina Prezidenti Ofisiniñ ve Nazirler Şurasınıñ binaları qırımtatar halqı ile birdemlik temsili olaraq aydınlatıldı. Bügün er bir ukrainalı 1944 senesi mays 18-de olıp keçken facianıñ acısını qırımtatarlarnen beraber çeke. Bu kün bizge bir de bir milletniñ toprağı çekilip alınsa da, bu milletni ruhunıdan ve iradesinden marum etmege mümkün olmağanı aqqında hatırlata.

Qırımtatar halqı genotsid qurbanlarınıñ ruhları şad olsun.

Volodımır Zelenskıy