Ukraina Prezidenti Volodımır Zelenskıy Qırımnı işğalden azat etüv mevzusını halqara seviyede muzakere etecek meydancıqlarnıñ miqdarını arttırmağa teklif ete.

”Bu, bizim toprağımız, bizim halqımız, asılında, Qırım aqqında laf etilmesi içün al-azırdaki meydançıqlarnıñ miqdarı yeterli degildir. Kerçekni aytacaq olsaq, Minsk ceryanında Qırım meselesi köterilmey”, – Kıyiv şeerinde keçirilgen matbuat konferentsiyası esnasında dep ayttı Devlet başlığı.

Onıñ aytqanına köre, Minsk ceryanı çerçivesindeki Üç taraflama kontakt gruppasınıñ toplaşuvlarında imzalanğan Minsk añlaşmaları boyunca muzakere etile bilecek meselelerniñ cedveli bardır.

”Anda Qırım meselesi yoq. Bunıñ adaletsizlik olğanınen razım”, – dep qoştı Volodımır Zelenskıy.

Aynı vaqıtta Prezident, Qırım meselesi onıñ kün tertibinde lâyıq bir yer alğanını qayd etti. Bu cümleden, Volodımır Zelenskıy qırımtatar halqınıñ vekillerinen körüşkeni aqqında ikâye etti. Keçenlerde daa bir böyle körüşüv keçirilip, qırımtatarlar ve Qırım yarımadası meselelerinen oğraşacaq iş gruppasınıñ teşkil etilmesi aqqında umumiy qarar alındı.

Bundan ğayrı, Volodımır Zelenskıy Qırım ve qırımtatarlarnıñ vaziyeti meselelerini başqa devletlerniñ reislerinen eki taraflama körüşüvlerinde de kötergenini bildirdi. Prezident qayd etti ki, Qırım yarımadasını ukrain bayrağı altına qaytaruv, Donbasnı işğalden azat etüv meselesi ile beraber Rusiyege qarşı qoyulğan sanktsiyalarnıñ lâğu etilmesiniñ şartlarından biridir.

”Bazı Avropa memleketleri olarnı tek Donbas ile bağlağanlarına, sanksiyalarnıñ lâğu etilmesi Donbas Ukrainağa qaytqan soñ mümkün olacağını tüşüngenlerine baqmadan, em ABD, en de Kanada ile AB memleketleriniñ ekseriyeti, şu cümleden, Almaniya ile Frenkistan, daima bu meseleni kötermekteler. Olar er şeyni añlaylar ve cemaat ögünde saktsiyalar siyaseti aqqında laf eteler, keçenlerde Pompeo (ABD Devlet kâtibi Mayk Pompeo – muarririyetten) maña bu aqta böyle aytqan edi: Qırım Ukrainağa qaytmağance, sanktiyalar lâğu etilmez”, – dep ayttı Devlet başlığı.

Volodımır Zelenskıy Qırım meselesini Normand formatındaki soñki körüşüv esnasında kötergenini, amma Rusiye muzakereden qaçınğanını bildirdi.