Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina nazirligi Ukraina tasil ve ilim nazirligi ile beraber 2021 senesi vaqtınca işğal etilgen topraqlarda yaşağan abituriyentler içün ukrain aliy oquv yurtlarına kiriş imtianlarına azırlağan stipendiyalı teminlevinen azırlav kurslarını teşkil etecekler. Bu, ”Vaqtınca işğal etilgen topraqlardaki gençlerni ğayrıdan integratsiya etüv” adında büyük programmanıñ pilot leyhası.

”Temelinde kurslar keçirilecek aliy oquv yurtından ibaret olğan cedvel tizilecek. ”Ukrain aliy oquv yurtlarına ”Donbas-Ukraina” ve ”Qırım-Ukraina” tasil merkezleri vastasınen kirecek balalarnı ukrain tasil ve içtimaiy saalarına akademik ve psihologik integratsiya etüv vastaları arasında olarnıñ azırlıq kurslarına kirmek, stipendiya ile teminlenmek ve yatakhanelerde bedava yaşamaq imkânları peyda olacaq”, – dep izaatladı ”İnterfaks-Ukraina” agentligine bergen eksklüziv blits-intervyusında Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina naziriniñ muavini İnna Dragançuk.

İlk yaz ayınıñ soñunda – oraq ayınıñ başında kurslarnıñ başlanması planlaştırıla, olar universitetlerde oquv ceryanı başlağance qararnen 2-2,5 ay devam etecek. Oquv yurtlarınıñ cedveli Ukraina tasil Nazirligi ile umumiy fermannen belgilenecek. Maaliyeni işletüv tertibine dair talaplarğa riayet etken bütün aliy oquv yurtları içün konkurs keçirilecek. Coğrafik temsilcilik de mıtlaqa diqqatqa alınacaqtır.

Kurslar bitken soñ, vaqtınca işğal etilgen topraqlarda yaşağan abituriyentlerniñ Ukraina topraqlarında qolaylaştırılğan kiriş şartları olğan 195 aliy ve zenaat-tehnikiy oquv yurtlarından bir-de-birine kire bilmeleri planlaştırıla.

Tafsilâtlı malümat:

 https://ua.interfax.com.ua/news/general/733637.html

Bundan ğayrı, kiriş kampaniyası ile bağlı nevbetteki planlar aqqında mıtlaqa saifemizde haber etecekmiz.