Çiçek ayınıñ 13-de Ukraina Prezidenti Volodımır Zelenskıy ”Ukraina Prezdentiniñ Qırım Muhtar Cumhuriyetindeki Temsilciliginiñ ilk nevbetteki vazifeleri aqqında” 160/2021 sanlı (https://cutt.ly/jvu1n9u) Fermanı ile Qırım Muhtar Cumhuriyeti ile Aqyar şeeriniñ vaqtınca işğal etilüvi şaraitlerinde Temsilcilikniñ faaliyeti boyunca Strategiyanı tasdıqladı.

Böyleliknen, 2021 senesi kiçik aynıñ 26-da imzalanğan ”Vaqtınca işğal etilgen Qırım Muhtar Cumhuriyeti ve Aqyar şeeri topraqlarınıñ işğalden azat etilüvi ile ğayrıdan integrasiya etilüvini maqsat etip qoyğan ayrı tedbirler aqqında” 78/2021 sanlı ferman (https://cutt.ly/Avu1RsF) ile 2021 senesi saban ayınıñ 24-de imzalanğan «”Vaqtınca işğal etilgen Qırım Muhtar Cumhuriyeti ve Aqyar şeeri topraqlarını işğalden azat etüv ve ğayrıdan integratsiya etüvge dair devlet strategiyası aqqında” Ukraina milliy mudafaa ve havfsızlıq Şurası tarafından 2021 senesi saban ayınıñ 11-de qabul etilgen qarar aqqında» 117/2021 sanlı Fermandan (https://cutt.ly/dvu1IU4) soñ, Qırım Muhtar Cumhuriyeti ve Aqyar şeerini işğalden azat etüv ve ğayrıdan integratsiya etüv siyasetini quvetleştirgen üçüci Ukraina Prezidenti Fermanı qabul etildi.

Ferman Qırım yarımadasınıñ vaqtınca işğal etilüvi şaraitlerinde Temsilcilikniñ faaliyetinde aşağıdaki ilk nevbetteki yönelişlerni belgiley:

• vaqtınca işğal etilgen Qırım Muhtar Cumhuriyeti ve Aqyar şeerini işğalden azat etüv ve telükesiz şekilde ğayrıdan integratsiya etüvge dair devlet siyasetini şekillendirüv ve amelge keçirüv;
• vaqtınca işğal etilgen Qırım Muhtar Cumhuriyeti ve Aqyar şeerinde yaşağan ve işbu topraqlardan memleket içinde avuşqan vatandaşlarnı qorçalamaq, olarğa qol tutmaq, olarnıñ aq-uquqlarına, qanuniy menfaatlarına ve serbestliklerine riayet etmek içün bütün kerekli tedbirlerni aluv;
• halqara seviyede keçirilgen tedbirlerde iştirak etüv;
  semereli informatsion siyasetke qol tutuv ve yalancı haberlerge qarşılıq kösterüv;
• Temsilcilikniñ institutsional imkâniyetlerini ve qabiliyetini quvetleştirüv.

Mütenasip ilk nevbetteki vazifelerni yerine ketirüv vaqtınca işğal etilgen Qırım Muhtar Cumhuriyeti ve Aqyar şeerini işğalden azat etüv ve integratsiya etüvge dair siyasetni quvetleştirip, aynı vaqıtta em Fermanda, em de Ferman ile pekitilgen Strategiyada añılğan institutsional işbirlikni eyileştirecektir.

İleride Temslcilik taqımı ile başqa devlet organlarını Qırım yarımadasınıñ işğalden azat etilmesini yaqınlaştırğan ve ğayrıdan integratsiya etüv ceryanlarına hızmet etken pek çoq müim vazifeler bekley.

Temsilcilikniñ faaliyetine dair Strategiya ile bu yerde tanış olmağa mümkün:https://cutt.ly/kvu1ZTv