Qural aynıñ 11-de vaqtınca işğal etilgen Qırım Muhtar Cumhuriyeti ve Aqyar şeeri topraqlarında işğalci memuriyet yerli musulmanlarnıñ evlerinde nevbetteki qanunsız tintüvlerini keçirdi. Neticede Özbekistan vatandaşı Ayub (Nabi) Rahimov ve daa bir qaç şahıs qanunsız şekilde yaqalandı.

Ukraina Prezidentiniñ Qırım MC-deki Temsilciligi vaqtınca işğal etilgen Qırım Muhtar Cumhuriyeti ve Aqyar şeeri topraqlarında nevbetteki qanunsız tintüvlerni, Rusiye Federatsiyasınıñ quvetçileri tarafından Özbekistan vatandaşı Ayub (Nabi) Rahimovnıñ öldürilüvini ve qırımtatarı Seydamet Gafarovnıñ yaqalanuvını takbih ete.

İnsanlarnı öldürgen ve qıynavlarğa oğratqan işğalci memuriyetniñ areketleri diniy ya da siyasiy sebeplerden taqip etüvni ve qorqutuvnı devam etmekni maqsat etip qoyğandır. Rusiye nevbetteki cinayetini kerçekleştirdi, işğalciniñ esas maqsadı ise, Qırımda qarşılıq kösterüv ve birdemlik areketlerini tamamen yoq etmektir.

Qırım MC ve Aqyar şeeri Prokuraturası Ukraina Ceza Kodeksi 162-nci maddesiniñ 2-nci qısımı (mesken toqunmamazlığını bozuv) ve 146-nci maddesiniñ 2-nci qısımı (qanunsız şekilde azatlıqtan marum etüv) boyunca al-azırda kriminal davanı açtı.

Mahkemeden evelki taqiqatnı Milliy Polisniñ Qırım MC ve Aqyar şeerinde Baş idaresi alıp baracaqtır.

Temsilcilik işğalci akimiyetni vaqtınca işğal etilgen Qırım MC ve Aqyar şeerinde kütleviy şekildeki insan aqları bozuluvlarını toqtatmağa ve qanunsız şekilde yaqalanğan şahıslarnıñ cemisini azat etmege çağıra. İşğalci memuriyet tarafından siyasiy sebeplerden qanunsız şekilde taqip etüv, şübesiz ki, em milliy em halqara seviyedeki faaliyetimizde Rusiye Federatsiyasına siyasiy-diplomatik basqını arttırmaq maqsadınen işletilecektir.

Fotoresim  Qırım birdemligi