Aynı vaqıtta bu kün yalıñız zenaatnı qayd etüvnen sıñırlanmayıp, aynı vaqıtta bu kibi faaliyet içün zarar körgenlerni añmak içün bir fursattır. Siyasiy cezalavlardan zarar körgen ve körmege devam etken jurnalistlerni qorçalav meselesi hususan vaqtınca işğal etilgen Qırım Muhtar Cumhuriyeti ve Aqyar şeeri topraqlarında aktual olıp qalmaqtadır.

Jurnalistlerniñ aqlarını muntazam sürette bozuv, yaqalavlar, insaniyetsiz davranuv, qıynavlar ve uydurılğan qabaatlavlarğa esaslanıp apis etüv vaqtınca işğal etilgen Qırım Muhtar Cumhuriyeti ve Aqyar şeeri topraqlarında professional kütleviy haber vastalarını yoq etmek maqsadınen işğalci memuriyet tarafından işletilgen vastalardan biridir.

Al-azırda vaqtınca işğal etilgen ukrain topraqlarında mustaqil jurnalistika qalmadı.

Misal olaraq ukrain jurnalisti Vladıslav Yesıpenkonen bağlı davanı ketirmek mümkün: 2021 senesi saban ayınıñ 9-da Vladıslav Yesıpenko Aqmescit şeerinde Taras Şevçenkonıñ doğğan künü munasebetinen keçirilgen tedbirlerni ziyaret etken edi, tedbirden soñ saban ayınıñ 10-da o, işğalci memuriyet vekilleri tarafından yaqalandı, saban ayınıñ 12-de Rusiye Federatsiyasınıñ işğalci memuriyetine boysunğan sözde ”Kıyiv rayon mahkemesi” V.Yesıpenkonıñ 2 ayğa, yani qural aynıñ 11-nece, tevqif etilgeni aqqında ”qarar” çıqardı, bundan soñ tevqif etüv müddeti yzatılğan edi.

Yaqalanğan vatandaşımız qanunsız şekilde ateşli silâni, onıñ esas qısımlarını istisal etüv, yañıdan yapuv ya da tamir etüvde ve patronlarını istisal etüvde qabaatlandı.

Saban ayınıñ 16-da Rusiye Federal Havfsızlıq Hızmeti Vladıslav Yesıpenkonıñ ”Ukraina mahsus hızmetleriniñ menfaatlarına çalışıp, istihbarat-zarar ketirici faaliyetnen oğraşqanını”, yani ”Qırımda insanlarnıñ kütleviy şekilde bulunğan yerlerniñ, yaşayışnı temin etüv yerlerniñ fotoresimler ile videosını çıqarğanını” ilân etti.
Abulqatı vastasınen tevqifhaneden yollanılğan mektüpte V. Yesipenko muntazam sürette köteklenip qıynalğanını, böyleliknen işğalci akimiyet işlemegen cinayetlerde özüni qabaatlı tanımasını istegenini añlatqan edi.

Vaqtınca işğal etilgen topraqlarda biñlernen Ukraina vatandaşları jurnalist faaliyetini alıp barğanları ve söz serbetligini numayış etkenleri içün taqip etildi. Onıñ içün Jurnalistler kününde vaqtınca işğal etilgen ukrain topraqlarında professional jurnalist faaliyetleri içün Rusiye Federatsiyasınıñ ve oña boysunğan işğalci memuriyetniñ areketlerinden zarar körgen matbuat vastalarınıñ vekillerine qol tutmağa ve böyle cinayetlerniñ kelecekte ögüni kesmek oğrunda çalışmağa çağıramız. Eminmiz ki, Qırımda kelecekte kene serbest jurnalistika ve obyektiv haberlerni almaq imkâniyeti ğayrıdan tiklenir.