2014 senesi biñlernen ukrain kriminal davaları boyunca malümatlar Rusiye Federatsiyası tarafından işğal etilgen yarımadada qaldı.
Bunıñ neticesi nedir? Zarar körgenler adaletni tiklep olamaylar. Şeklengen ve qabaatlanğanlar adaletten olar içün telükesiz topraqlarda saqlana, ya da özleri de böyle davalarnı bitirip olamaylar. Ukrain uquq qorçalayıcıları da bu davalar boyunca faaliyetlerini yürsetip olamaylar.
Tünevin Yuqarı Mahkemede ”Malümatları idare etilmegen topraqlarda ya da işğal etilgen Qırımda bulunğan davalarnıñ taqip etilmesi ve baqılması ile problemlerniñ çezilüvine çare qıdıruv boyunca ekspertler munaqaşası” mevzusında tögerek masa olıp keçti. Tedbirde Yuqarı mahkemeniñ mahkemecileri, Ukraina Prezidentiniñ Qırım Muhtar Cumhuriyetindeki Temsilciligi, Ukraina adliye Nazirligi, Ukraina içki işler Nazirligi, Baş prokuror Ofisi, Vaqtınca işğal etilgen Ukraina topraqlarını ğayrıdan integratsiya etüv meseleleri boyunca Nazirlik, Ukraina devlet mahkeme memuriyeti, Qırım Muhtar Cumhuriyeti ve Aqyar şeeri Prokuraturası, İnsan aqları boyunca Ukraina-Helsinki birliginiñ ekspertleri iştirak etti.
Tedbirniñ esas neticesi – malümatları vaqtınca işğal etilgen topraqlarda qalğan kriminal davalar boyunca mahkeme ve yerine ketirüv faaliyetini ğayrıdan tiklevniñ yolunı belgilev, ğayrıdan tiklevniñ çaresi olmasa, işbu davalarnı çezüv yolunı belgilev boyunca qanun leyhasını beraberlikte işlep çıqarmaq qarar etildi.
Yani, añlaşılğan tilde aytqanda, işğalden evel Ukraina tarafından açılğan, amma bitirilmegen kriminal davalarnı ğayrıdan tiklep, adaletke ketire bilecek vasta vucutqa ketirilmeli.
Bu qanun leyhası keçici devirdeki adaletke dair devlet siyasetini inkişaf ettirüv ceetten müimdir. Vatandaşlarımıznıñ işğal sebebinden bozulğan aqlarınıñ ğayrıdan tiklenmesine yol berecek vastalar qıdırılacaq.
Bu teşebbüs, Prezident tarafından bu yıl tasdıqlanğan Qırımnı işğalden azat etüv ve ğayrıdan tiklevğe dair Strategiyanı amelge keçirüv planındaki vazifelerden biridir.
Devletimiz, RF silâlı tecavüzi neticesinde ketirilgen zararnıñ ödenmesi ya da qurbanları içün adaletniñ tiklenmesi oğrunda qolundan kelgenlerini yapmalıdır.