Yarımadanıñ rusiye tarafından on eki yıldan berli devam etken işğali boyunca Ukrayinanen bağlı er şeyge qarşı zorbalıq alışılğan bir şey oldı. Repressiyalar, taqipler, uydurılğan mahkeme davaları ve öldürüvler – rf tarafından ep qullanılğan nezaret aletleridir. Amma bu şaraitlerde bile Qırım boysunmadı: Qırım Ukrayinanıñ bir qısmı olıp qala, onıñ sakinleri ise, öz serbestligini ve canlarını telükege atıp, qarşılıq köstermege devam eteler.

Milliy Qarşılıqlar Merkezinen beraberlikte alıp barılğan #qarşılıq_areketi teşebbüsi çerçivesinde, işğalge baqmadan, ukrayin menliginden vazgeçmegen insanlarnıñ şaatlıqlarını toplay ve aydınlatamız. Bundan da ğayrı, biz işğalci akimiyetniñ cinayetlerini ve tınç sakinlerge qarşı zorbalıqnı vesiqalaymız. Bu ikâyeler, qorqu serbestlikke olğan istekni yoq etip olamağanınıñ, qarşılıq ise eñ qaranlıq zamanlarda bile devam etkeniniñ isbatıdır.

• Rusiyeniñ rostov-na-donu şeerindeki mahkeme vaqtınca işğal etilgen Keriçniñ 50 yaşındaki sakini Vasil Drosovnı, Telegram saifesinde yazğan tefsirde sözde “terrorcılıq faaliyetini aqlamaq” içün uydurılğan qabaatlavlarnen apis cezasına mahküm etti.
• Aqyardaki işğalci “mahkeme” 53 yaşındaki Qırım sakini Yevgen Gudenkovnı, Ukrayina mudafaa quvetlerine malümat yetkizgenini iddia etip, sözde “devlet hainligi” ve “patlatıcı maddelerni qanunsız qullanuv” aqqında qabaatlavlarnen 17 yılğa apis cezasına mahküm etti. Sözde “mahkem”» 17 yıllıq apis cezasından ğayrı, 1 yılğa serbestlikni sıñırlama, 400 biñ ruble cöreme tayin etti, arabasını, cep telefonını, bilgisayarını musade etmege qarar çıqardı.
• İşğalciler Aqyarda 19 yaşındaki yerli sakinni tutıp, onı ukrayin mahsus hızmetleri talimatınen “diversiya azırlağanında” qabaatladılar.

• İşğalci “Qırım yuqarı mahkemesi” yarımadanıñ 44 yaşındaki sakinini cenkke qarşı çıqqanı ve sanki ukrayin istihbaratına malümat yetkizgeni içün sözde “devlet hainligi” aqqında uydurılğan dava boyunca 18 yılğa apis cezasına mahküm etti.
• Canköy rayonınıñ sakini Lera Cemilova ukrayin isthbaratına sanki malümat yetkizgeni iddia etilip, sözde “devlet hainligi” aqqında uydurılğan qabaatlavlarnen 15 yılğa mahküm etildi.

Daimiy basqı, taqipler ve telükege baqmadan, işğal etilgen yarımadada adım-adım keniş qarşılıq areketi qurulmaqta. Endi cesaretniñ ayrıca areketleri degil de, tüşünceli ve izçen areket etecek koordinatsiyalanğan toplulıqlar aqqında söz yürsetile. Olarnıñ arasında timsaller, yarlıçıqlar ve listovkalar yardımınen cemaat meydanına ukrayin barlığını qaytarğan ve Qırımnıñ kerçek aitligini köstergen “Jovta Striçka” (“Sarı Şerit”) areketi yer almaqta.

Meselâ, yanvarniñ 31-nde Aqmescitte, Aqyarda ve Aluştada “Jovta Striçka” (“Sarı Şerit”) areketiniñ iştirakçileri vatanperverver yazılarnen resimler çıqarıp, rus işğaline qarşı turğanlarını kösterdiler.

Bundan da ğayrı, Qırımda şahsiy yazılar formatı vastasınen işğal altında yaşağan qırımlı qadınlarınıñ ayatı ve tecribeleri aqqında ikâye etken “Zla Mavka” leyhası da bar.

Siyasiy repressiyalarnen beraber işğalci idare qanunsız şekilde memuriy basqılarnı da faal sürette qulllanmağa devam ete. 2026 senesi yanvarniñ 14-nde berilgen malümatqa köre, vaqtınca işğal etilgen Qırımda “rusiye federatsiyasınıñ silâlı quvetlerini itibardan tüşürüv” aqqında rf memuriy cinayetler kodeksiniñ 20.3.3 maddesine köre açılğan 1672 dava qayd etildi. 1542 davada para cezalarınıñ berilmesi ya da davalarnıñ birleştirilmesi aqqında qarar alındı. 17 davanıñ baqılması devam ete.