Bugün qanunsız olaraq 9 yıl qattı rejim apis müddetine mahküm etilgen qırımtatarı Zevri Abseitov aqqında ikâye etemiz.

Apisten evel yaşayışı

Abseitov Zevri Seitumer oğlı 1975 senesi avgustnıñ 12-nde Özbekitanda dünyağa keldi, çünki onıñ qorantası 1944 senesi anda sürgün etilgen edi.

1993 senesi onıñ ailesi Qırımğa qaytıp keldi ve Qarasuvbazar rayonuna yerleşti. 

Vatanğa qaytıp kelgen soñ Zevri Aqmescit tıbbiyet universitetine stomatologiya fakultetine oqumağa kirdi. Kündüzleri oquy edi, boş vaqıtlarda ise ana-babasına yardım etmek içün çalışa edi. Universitetni bitirgen soñ Zevri öz stomatologiya kabinetini açtı. 

İşğalciler neler uydurıp çıqardı

2016 senesi mayısnıñ 12-nde rus quvetçileri Bağçasarayda kütleviy tintüvler ötkerdi ve Zevri Abseitovnı daa üç qırımtatarınen beraber tevqif ettiler.

Mahkeme davasınıñ baqıluvı 2 yıldan ziyade devam etti ve o vaqıt Zevri Aqmescit SİZO-sında tutuldı, 2018 senesi dekabrniñ 24-te rostov-na-donu şeeriniñ mahkemesi Zevrini 9 yıl qattı rejimli apis müddetine mahküm etti.

Zevri Abseitovnıñ apiske atılmasınıñ kerçek sebebi ne?

Qırımda qırımtatar halqınıñ bir çoq temsilcisi kibi Zevri Abseitov da öz dini, milleti ve baqışları sebebinden işğalci memuriyet tarafından taqiplerge oğratıldı. Onıñ mahküm etilmesi, işğalci akimiyet tarafından qarşılıq ve fikir farqınıñ er angi kösterüvini bastırmaq maqsadınen alıp barılğan qırımtatar halqına qarşı keniş repressiya kampaniyasınıñ bir qısmı oldı.  Zevri, çoqusı semetdeşi kibi, uydurılğan sahte deliller esasında terrorizmde qabaatlandı, bu işğalcilerniñ Qırım tamır halqını taqip etmek içün  çıqarılğab kampaniyadır.

Zevri Abseitov şimdi qayda?

2019 senesi iyülniñ 11-nde moskvadaki rf yuqarı mahkemesi Zevriniñ advokatları tarafından berilgen apellâtsiyasını baqıp çıqtı ve onıñ qanunsız mahküm müddetini üç ayğa qısqarttı.

2019 senesi sentâbrniñ 1-2 gecesi Zevri Abseitovnı rusiye federatsiyasınıñ stavropol ilindeki 1-nci koloniyağa avuştırdılar. Anda ketirilgen soñ mabüsni qanunsız olaraq üç aftağa ceza izolâtorına qoydılar.

Abseitovğa kerekli tibbiy yardım kösterilmegeni sebebinden onıñ apiste keçirgeni yıllar devamında sağlıq vaziyetine pek büyük zarar ketirdi. Mabüsniñ gipertoniyası, büyrek, aşqazan ve buğum meseleleri bar. Yaramay tutuluv şaraitleri ve tibbiy yardımnıñ olmaması sebebinden onıñ vaziyetini ket-kete zayıflaştıra.