Bugün biz, işğalciler tarafından qanunsız olaraq, 5 yılğa mahküm etilgen qırımtatar Ruslan Abdurahmanovnıñ ikâyesini paylaşamız.

Apisten evel yaşayışı

Ruslan Abdurahmanov 1991 senesi fevralniñ 12-nde Herson vilâyetiniñ Geniçesk rayonınıñ Azovske köyünde doğdı ve qorantasınen anda yaşay edi.

İşğalciler neler uydurıp çıqardı?

2022 senesi mayıs 22 künü Rusiye havfsızlıq küçleri Herson vilâyetiniñ işğal etilgen Geniçesk rayonı Azovske qasabasında basqın keçirip, Ruslan Abdurahmanovnı qaçırdılar ve belli olmağan yerge alıp kettiler. İşğalciler onı 2016 senesi Ukrayinanıñ şarqında keçirilgen Antiterror areketinde iştirak etmekte qabaatladılar.

“Eki balamnıñ ve apayımnıñ ögünde meni urdılar, men yıqıldım, tepmege başladılar. Yedige yaqın kişi edi. Soñ başımnıñ üstüne qara çöplük torbasını kiysetip, başımnı lentanen sardılar, meni çıqarıp, maşinağa oturttılar”.

Abdurahmanov tevqif etilgen soñ, Geniçesk şeerindeki 17-nci sanlı zenaat-tehnika mektebiniñ binasında vahşiyce sorğuğa, şu cümleden, çekiştirüvlerge oğratıldı. Andan onı zornen Aqmescitke, FSB binasına alıp kettiler, anda daima psihologik basqı ve fizikiy zorbalıq qorquzuvı altında sorğular devam etti. Em özüne, em de qorantasına yönelgen tehdit ve qorqutuv Abdurahmanovnı uydurılğan qabaatlavlarnı boynuna almağa mecbur etti.

”Meni mağazğa kirsetip, çekiştirdiler. Qollarımnı, közlerimni bağlap, bir köşege qoydılar. Ceset zeeri qoqusı kele edi. Soñ çeçen aktsenti olğan üç adam kelip, meni yerge qoydılar, pıçaqlar çıqardılar ve meni cezalamaqnen qorquzdılar. Ondan soñ meni elektrik aqınmem işkencege oğrattılar. Menim qorantamnı da öyle yapmaqnen qorquzdılar, soñra olarnıñ başı kirip, birisi endi öldürilgenlerini, onı asmadan çıqarıp, kömmek kerek olğanını ayttı”.

2022 senesi avgustnıñ 9-nda Aqmescitteki sözde ”mahkeme” üküm çıqarıp, Abdurahmanovnı beş yılğa maksimal havfsızlıqlı apis cezasına mahküm etti.

Ruslan Abdurahmanovnıñ kerçek tutuluv sebebi ne?

Bir çoq qırımtatarlar kibi, Ruslan Abdurahmanov da etnik mensüpligi sebebinden işğalci idaresi tarafından taqiplerniñ qurbanı oldı. Bu qırımtatar halqınıñ medeniyetini, tilini, menligini bastıruvğa yönelgen sistematik diskriminatsiya ve zulum siyasetiniñ bir qısmıdır.

Ruslan Abdurahmanov şimdi qayda?

Üküm çıqarılğan soñ, Ruslan Aqmescit şeeriniñ 2-nci SİZO-sında buluna edi. Onen beraber oda içinde daa dört kişi tutula edi. Olarnıñ episine kündüz töşeklerde oturmaq yasaq etildi, bu ise qoşma fizikiy ve psihologik stress yarattı. Kamerada er kün tintüvler keçirildi, bu da mabüslerniñ şahsiy alan aqqını boza ve daima stress müitini yarata edi.

Ruslan Abdurahmanovğa kerekli ilâclar berilmedi, bundan ğayrı, oña tışqa çıqma aqqı da berilmedi, bu onıñ beden vaziyetine ve ruhuna menfiy tesir etti. Oña boyun omuzındaki üç quyuldıqnı çıqarmaq içün ameliyat kerek, bu ise onıñ tutulmalar peyda olmasına, mikroinsultlarğa, müçeleriniñ çalışmamasına sebep oldı.

Daa yaqın zamanlarda Abdurahmanov rusiye federatsiyasınıñ çelâbinsk vilâyetinde yuqarı Uralsk apshanesinde tutuldı.

Şimdi Abdurahmanov Qırımdan 1000 km ziyade uzaqlıqta olğan tambov vilâyetiniñ miçurinsk şeerinde 5-nci koloniyasında tutula.

***

Materiallar Ukrayinanıñ vaqtınca işğal etilgen Topraqlarnıñ Reintegratsiyası Nazirliginen beraberlikte #10YılQarşılıq informatsion aktsiyası çerçivesinde azırlandı. İnformatsion aktsiya Qırımnıñ işğaline qarşı turuv kününi qayd etmeknen keçirilgen tedbirlerniñ bir qısmıdır.