Bugün qanunsız şekilde 12 yılğa mahküm etilgen qırımı faal Vadım Siruk aqqında ikâye etemiz. 

Apisten evel yaşayışı

Vadım Siruk 1989 senesi fevralniñ 20-nde Qırımda dünyağa keldi. Onıñ balalığı ve yaşlığı Seyitlerde keçti, anda orta mektepniñ doquz sınıfını bitirdi.

Mektepten soñ Vadım köy hocalığı litseyine oqumağa kire, amma maddiy qıyınlıqlar sebebinden qorantasına yardım etmek içün yarım vaqıtlı oquvğa keçe. Soñra Yalta şeerine köçip, anda tıp ve turmuş tehnikası satışlarınen oğraştı.

2012 senesi Vadım İslâm dinini qabul etip, onıñ esaslarına riayet etmege başladı.

İşğalciler neler uydurıp çıqardı?

2016 senesi fevralniñ 11-nde işğal etilgen Yalta ve Aluştada işğalci telükesizlik küçleri yerli sakinlerniñ evlerinde nevbetteki kütleviy tintüvler keçirdiler. Aynı kün devamında Vadım Siruknen beraber din erbabı Muslim Aliyev, aq-uquqorçalayıcı Emir-Usein Kuku, mektep qaravulı İnver Bekirov da yaqalandılar.

Bundan soñ Aluşta rayonınıñ Qızıltaş köyünde de böyle sebepten daa eki yerli sakin – Arsen Cepparov ve Refat Alimov tevqif etildiler.

2019 senesi noyabrniñ 12-nde rostov-na-donu şeerindeki rus mahkemesi Vadım Siruknı qanunsız olaraq 12 yılğa qattı rejimli apis cezasına mahküm etti.

Vadım Siruknıñ apiske atılmasınıñ asıl sebebi nedir?

Vadım cemaat yaşayışında faal iştirak ete edi, o diniy binalarnı, hususan Qoy Eli köyündeki caminiñ tamirlevinen, Simeizdeki qadimiy mezarlıqnıñ qorçalavınen oğraştı, bayram tedbirlerini teşkil etti ve diniy merasimlerde iştirak etti.

Qırımnıñ işğali sebebinden meydanğa kelgen rus repressiyaları ve taqipleri başlanğan soñ, Vadım siyasiy mabüslerniñ qorantalarına faal şekilde qol tuttı, qanunsız “mahkeme” oturuşuvlarını ziyaret etti, siyasiy mabüslerniñ qorantalarına maddiy ve maneviy destek kösterdi.

Onıñ tevqif etilmesi, işğalcilerniñ uydurma qabaatlavlar ve repressiyalar vastasınen er türlü qarşılıqnı yoq etüvge baqtırılğan sistemalı basqı siyasetiniñ bir qısmı oldı.

Vadım Siruk şimdi qayda?

2020 senesi iyünniñ 25-nde rusiyeniñ moskva vilâyetindeki vlasiha şeer mahkemesi Vadim Siruknıñ apellâtsiyasını red etti.

Muracaat red etilgen soñ siyasiy mabüs Qırımdan 2000 km ziyade uzaqlıqtaki rusiye federatsiyasınıñ başqordstannıñ salavat şeerindeki İK-2 koloniyasına avuştırıldı.

Anda ketirilgen soñ onı qanunsız şekilde 17 künge ceza izolatorına yolladılar. Bundan da ğayrı, yaramay iklim, normal yemeklerniñ olmaması ve vitaminlerniñ eksikligi sebebinden mabüsniñ sağlıq vaziyeti daima yaramay. Onıñ tişlerinde de problemalar bar, apishaneniñ tiş ekimi ise anda aman-aman kelmey.

“Balalar ne qadar öskenlerine şaşa. O, Amira qızımıznı eki yaşında hatırlay, şimdi ise onıñ yanına endi öz meraqları, qayğıları olğan ösmür keldi. Kiçik qızımız Hanifa bütün üç kün devamında babasınıñ yanından ayrılmadı”, — dep, paylaştı siyasiy mabüsniñ ömür arqadaşı.