2014 senesi martnıñ 3-nde qırımtatar faali Reşat Ametov Aqmescitniñ merkeziy meydanına çıqıp, rusiyeniñ Qırımnı işğal etmesine qarşı narazılıq köterdi. O, öz toprağında serbest yaşama ve işğalcilerniñ qanunsız areketlerini tanımama aqqını ilân etti. Bu yarımada zapt etilgen soñ ilk cemaat qarşılıq kösterüv areketlerinden biri oldı.

Reşat Ametov Menlik inqilâbına qoltutıp, göñülli olaraq arbiy hızmetke ketmege planlaştıra edi. O, narazılıqqa çıqmadan bir qaç kün evel içtimaiy ağlarda narazılıq aktsiyası keçirme niyeti aqqında yazdı. Faqat martnıñ 3-nde o, rus askerleri ve sözde “krımskaya samooborona” temsilcileri tarafından tutulıp, belli olmağan yerge alıp ketildi. O vaqıttan berli onı kimse sağ körmedi.

2014 senesi martnıñ 15-nde Reşat Ametovnıñ işkencelerge oğratılğan cesedi Qarasubazar rayonınıñ Ortalan köyünde tapıldı – o, Qırımda rus tecavusınıñ birinci arbiyolmağan qurbanı oldı. 18 mart künü Aqmescitte onı soñki yolculığına ozğarmaq içün biñlerce qırımtatarı keldi.

Qabaatlılar daa cezalanmadılar. Ukrayin uquq qorçalav organları bu öldürüvni cenk cinayeti ve insaniyetke qarşı cinayet olaraq tasnif eteler. Qırımnıñ işğal etilmesi sebebinden iş materiallarına irişüv sıñırlı, amma vesiqalaştıruv işleri devam ete. Hususan, 2019 senesi ukrayin tarafı qaçıruvda şübelengenlerniñ adlarını bildirdi.

Reşat Ametovğa ölgen soñ Ukrayina Qaramanı unvanı berildi. Onıñ adı Qırımnıñ rus işğaliniñ birinci qurbanı olaraq ve yeñilmezlik timsali oldı. Onıñ cesürligini hatırlap, biz Qırımnıñ azatlığı ve işğalden zarar körgenler içün adalet oğrunda küreşni devam etemiz.