Avgustnıñ 14-nde, esir deñişüvi çerçivesinde Ukrainağa 84 vatandaş, 33 arbiy ve 51 arbiy olmağan vatandaş qayttı. Azat etilgenler arasında – qırımlı Yaroslav Balitskiy de bar, rus işğalci memuriyeti onı bu sene iyün ayında “devlet hainliginde” uydurılğan qabaatlavlar sebebinden 20 yılğa qadar apis cezasına mahküm etken edi.

Al-azırda Balitskiy tibbiy müessisede buluna ve anda tedaviylev körmekte. O, kerekli yardım alğanını ve ilerideki reabilitatsiyağa azırlanğanını bildirdi.

İşğal etilgen Qırımda rus quvet strukturalarınıñ Balitskiyni taqip etmesi ilk degil. Bundan evel onı qanunsız şekilde “patlayıcı donatmalarnı saqlağanında” ve “elektrik ağlarınıñ tayançlarını bozacaq olğanında” qabaatlay ediler. Niaiy üküm “mahkemeci” Viktor Sklarov tarafından alındı, Ukrainada oña qarşı devlet hainligi şübesinen cinaiy iş alıp barıla.