Kiçik aynıñ 25-den başlap, saban ayınıñ 4-nece Yaroslav Mudrıy adına Milliy kitaphanede (Kıyiv şeeri, M. Gruşevskıy soqağı, 1) işğal etilgen Qırımda zorbalıqnen ğayıp olğan qurbanlarğa bağışlanğan ”15 hırsızlanğan ayat” serlevalı foto sergisi keçirilmekte.
Serginiñ maqsadı – ukrain cemiyetine Qırımda zorbalıqnen qaçırılğan faaller aqqında hatırlatmaq.
Şergi çerçivesinde ale daa ne de olüsi, ne de tirisi tapılğan 15 kişiniñ resimlerinen ikâyeleri numayış etile. Olar, işğalci akimiyetke qarşılıq köstergen ukrain ve qırımtatar faalleri, ya da faallerniñ aqrabalarıdır.
Sergini ziyaret etmege davet etemiz, çünki işalge qarşılıq köstergen insanlarğa diqqat ve ürmetimiz, olarnıñ qorantalarına qol tutuv – eñ azından yapa bilecegimiz areketler. İşğalci akimiyet bu aqta sessiz qalmağa istey, biz ise buña yol bermemelimiz!
Sergi QırımSOS cemaat teşkilâtı tarafından Qırımda ğayıp olğan vatandaşlarnıñ qıdırıluvını, qanunsız şekilde yağalanğan faallerniñ azat etilüvini, olarnıñ qorantalarına qol tutuvnı maqsat etip qoğan «Find&Free» haber leyhası çerçivesinde teşkil etildi.
Umumen alğanda, QırımSOS cemaat teşkilâtınıñ malümatlarına köre, 2014 senesinden berli işğal etilgen Qırımda 44 kişi zorbalıqnen ğayıp oldı. Daa soñra olardan 19 kişi sağ olaraq tapıldı, 3 kişi apishanelerde tapıldı, 1 kişi başqa devletke teslim etildi, daa bir kişiniñ ölüsi tapılğan edi. 15 kişiniñ taqdiri aqqında ale daa belli degil.