Bugün Appaz Kurtamet 23 yaşını yoldura. Bu künni o yaqınları ile keçire bilir edi, amma o, qanunsız şekilde rusiyedeki pskov vilâyetiniñ apishanesinde tutula.

2022 senesi işğalci memuriyet Appaznı Herson vilâyetindeki Çonğar kiriş noqtasında tuttı ve onı rusiyede qanunsız olğan silâlı birleşmeni maliye etüvde qabaatladı. Kerçekte ise yigit tanışına 500 grivna borc bergen. Uquq qoruyıcılarnıñ aytqanına köre, gençniñ tanışları “Qırım” göñülli batalyonında hızmet ete edi, bu da qabaatlav içün sebep oldı. 2023 senesi iyün ayında ruslar qanunsız sürette Appazni 7 yılğa qadar azatlıqtan marum ettiler, olardan 6 yıl sert rejimli koloniyada keçmeli.

Keçenlerde Lüdvig-Maksimilian Münhen universitetiniñ Şarqiy ve Merkeziy-Şarqiy Avropa kafedrasınıñ dotsenti Frantsiska Devis Appaz Kurtametniñ mentorı oldı. Onıñ maqsadı — vaqtınca işğal etilgen Qırımda ve rusiye topraqlarındaki insan aqlarınıñ bozuluvına halqara toplulıqnıñ diqqatını celp etmektir.

2024 senesi işğalciler Appaznıñ babası Halil Kurtametni de mahküm ettiler. Onı “Noman Çelebicihan adına qırımtatar göñülli batalyonında iştirak etüvde” qabaatladılar. İşğalcilerniñ iddalarına köre, 2015 senesi aqay Geniçesk rayonında batalyon azaları içün musafirhaneler açtı. Davanıñ baqıluvı “gizli şaatlarnıñ” ifadelerine ve Rusiye quvetçileri ile faal işbirlikte bulunğan ekspertlerniñ neticelerine esaslanıp, bütün qanun qaidelerini boza.

Appaz Kurtamet – eñ genç Qırım siyasiy mabüslerinden biridir. Qırımdaki kerçek şundadır ki, yaqında daa ösmür olğan gençler endi işğal etilgen topraqlarda rusiye quvetçileri tarafından taqip etile ve apishanelerde fizikiy ve ruhiy işkencege oğratıla.

2025 senesiniñ avgust ayına qadar 220 Ukraina vatandaşı rusiye apishanelerinde buluna, olardan 133 – qırımtatarı. Bu insanlar bizden destek ve imaye talap etecek, olarğa qol tutmaq içün “Serbest Qırımğa mektüpler” teşebbüsine qoşulıp, olarğa mektüp yaza bilesiñiz. Siyasiy mabüslerniñ olarnıñ mında unutulmağanını ve olarnıñ serbestligi içün devam etkenini bilmek müimdir.