Bütündünya gumanitar yardım künü silâlı zıddiyet, işğal ya da diger buhran vaziyetlerinden zarar körgen insanlarnıñ ihtiyaclarına diqqat celp etmek içün qayd etile. Bu kün işğal etilgen Qırım halqara toplulıqnıñ diqqatına lâyıq olğanını qayd etmek içün daa bir fırsat, çünki gumanitar yardım – bu aşayt malları ya da ilâclar degil, bu eñ evelâ insan aqları, er bir Ukraina vatandaşınıñ havfsızlığı ve menliginiñ qoruvıdır.

Qırım Muhtar Cumhuriyeti ve Aqyar şeeriniñ vaqtınca işğali şaraitlerinde yerli sakinler tibbiy yardım, tasil, gumanitar yardım ve uquqiy qoruvdan marum qaldılar. Vaqtınca işğal etilgen topraqlarnıñ sakinleri kerçek malümatqa irişip olamay, öz inançları içün taqip etile, olarnıñ tasil ve tibbiy hızmet aqqı, em de din serbestligi aqqı sıñırlanmaqta. Onıñ içün Ukraina, halqara toplulıqnıñ rf-ke qarşı basqısını arttırmasına muhtac. Maqsadı – halqara gumanitar uquqınıñ bozuluvlarını toqtatmaq ve işğalden eñ çoq zarar körgen balalar, qadınlar ve qart insanlarnıñ aqlarını qorçalanmasını temin etmek.

Ukraina Prezidentiniñ Qırım Muhtar Cumhuriyetindeki Temsilciligi devlet akimiyet organları, halqara teşkilâtlar ve uquq qoruyıcı teşebbüsler ile işbirlikte gumanitar vaziyetni nezaret ete, zarar körgen vatandaşlarğa yardım bere ve işğal etilgen topraqta insan aqlarınıñ bozuluvlarını qayd etmege yardım ete.

Faqat şunı hatırlamalımız ki, Ukraina devleti Qırımdan köçip kelgen şahıslarğa destek berüvge büyük diqqat ayıra. Hususan, içtimaiy yardım ve pensiya meselelerinde, şu cümleden vesiqalarını coyğan ya da evlerini terk etmege mecbur olğan vatandaşlarğa destek köstere. Ukraina vatandaşları Ukraina nezaretindeki topraqlarda tibbiy ve tasil hızmetlerinden faydalana bileler. Devlet qurulışları ve cemaat teşkilâtları vastasınen uquqiy ve ruhiy yardım kösterile. Bundan da ğayrı, Ukraina köçip kelgenlerniñ ev meseleleriniñ çezilüvine, işke kirsetilüvine ve yerli cemiyetke integratsiyasına yardım ete.

Qırım sakinlerine ve rusiye tecavuzından zarar körgenlerge yardım qolunı uzatqan er bir göñülli, hayriyeci, halqara ortaq ve teşkilâtqa minnetdarmız.

Er bir Ukraina vatandaşı, yaşağan yerine baqmadan, qoruv ve destek körmesi içün çalışmağa devam etemiz. Qırım – Ukrainadır, onıñ sakinleri ise – umumiy qorantamıznıñ bir parçasıdır.