1993 senesi Aqmescitteki Qurultaynıñ işi esnasında qırımtatar milliy areketiniñ halqara faalligi ve Birleşken Milletler Teşkilâtında (UNPO) iştirak etmesini quvetleştirmek maqsadınen vesiqalar paketi qabul etildi. Bu adım Qırım tamır halqınıñ aq-uquqlarını tiklemek ve Qırım meselesini halqara mesüliyetlik saasına qaytarmaq içün devamlı küreşniñ müim bir parçası oldı
UNPO-ğa qoşuluv Qırımtatar Milliy Meclisiniñ strategik adımı olıp, tamır halqnıñ aq-uquqları içün küreşni halqara seviyede institutlaştırmağa yönelgen edi. Bu qarar qırımtatarlarnıñ halqara subyektivligini pekitti, tek Ukraina içinde degil de, dünya platformalarında talaplarnı ifade etmege imkân berdi, on yıllar devamındaki sürgünlikten soñ öz vatanına qaytuv ve aqlarnı tiklev meselelerine diqqat çekti. UNPO-nıñ platforma olaraq seçilmesi de qırımtatar areketiniñ demokratiya ve zorbalıqsız qarşılıq kösterüv printsiplerine sadıqlığını ayrıca qayd etti. Qararnıñ eñ yüksek vekil organı — Qurultay tarafından qabul etilmesi halqnıñ mustaqil Ukrayina içinde özüni tayin etüv isteginde birligine daa bir isbat oldı.
O devirde de qırımtatar halqınıñ yolbaşçıları halqara birdemlik, diqqat, tanıluv olmasa, adaletke yol daa uzun ve ağır olacağını açıq-aydın ifade etken ediler. O sebepten, halqara platformalarda iştirak etüv olarğa doğrudan, on yıllar devamında aqlarından marum qalğan halq adından dünyağa seslenmege imkân bergen bir alet olaraq körüle edi.
“Biz öz aqlarımız oğrunda zorbalıqsız küreş yolunı seçip aldıq, ve Temsilsiz Milletler ve Halqlar Teşkilâtına qoşulmaq – dünyağa çağıruvımız. Qırımtatar halqı milliy azlıq degil, qırımtatar halqı – halqara uquqnıñ subyektidir, onıñ sesi medeniy cemiyette eşitilmek kerek.” — Mustafa Cemilev, Qurultay vaqtında çıqışı, 1993 s.
Bugün Qırımnıñ rusiye federatsiyası tarafından vaqtınca işğal etilmesi bağlamında, bu tarihiy tecribe ayrıca müimdir. Halqara teşviqat insan aqlarını qorçalav, işğal vaqtında ukrayin vatandaşlarına yardım etmek ve deñişmegen pozitsiyanı tasdiqlamaqnıñ esas saalarından biri olıp qalmaqta: Qırım – Ukrayina, tamır qırımtatar halqınıñ aqları ise kelecekte yarımadanıñ işğalden qurtarılması ve reintegratsiyasınıñ ayırılmaz bir parçasıdır.