2014 senesi saban ayınıñ 6-da Rusiye Federatsiyası Qırımda akimiyetni küç vastasınen zapt etkenini numayış etken aşağıdaki vaqialar yüz berdi:

📌Ecnebiy matbuat vastalarınıñ temsilcileri köteklendi.
📌”Argumentı tıjnâ” matbuat vastasınıñ jurnalistine ücüm etildi.
📌”Qırım parlamenti” akimiyet organlarını teşkil etmege qarar aldı.
📌”Qırım yuqarı şurası” ”referendum” keçirmege qarar aldı.
📌”Aqyar şeer şurası” Rusiye Federatsiyasınıñ terkibine kirmege qarar aldı.

Aqyarda Ukraina arbiy-deñiz quvetleri komandanlığınıñ yanında sözde ”qırım samooboronasınıñ” vekilleri 5-nci kanalnıñ çekim gruppasını kötekledi, neticede öperator zarar kördi. Aqmescit şeerinde bir qaç yaş erkek alman ”Bild” gazetasınıñ 2 jurnalistini kötekledi.
5-nci ve «1+1» kanallarınıñ yayınlavları toqtatıldı, ”Çornomorska TRK” kanalınıñ bericileri ağına ”Rossiya 24” kanalınıñ televizion signalı qoyuldı, bundan ğayrı, işğalciler başqa rus kanallarını çalıştırmağa tırıştılar.

«1+1» kanalınıñ sıqlığında ”Rossiya” rusiyeli devlet telekanalı yayınlamağa başladı. Aqmescitteki ”Qırım” devlet televizion ve radio şirketini kamuflâj urbasına kiyingen onlarnen insanlar qurşavladı.

Ukrainalı ve (rusiyeli jurnalistlerden ğayrı) yabancı jurnalistler Qırım Muhtar Cumhuriyeti Yuqarı Şurasınıñ binasında keçirilgen ve Rusiye Federatsiyasınıñ terkibine kirüv ve referendum keçirüv aqqında qanunsız qararlar qabul etken nevbetten tış oturışuvğa kirip olamadı.
Aqmescitte sözde ”kazaklar” ecnebiy çekim gruppasına ücüm etti: Britaniyalı çekim gruppasından satellit donatuvlarını çekip alğanlar, Bulğaristandan kelgen jurnalistler Borân Katsarov ile Dimitriy Kenarovnı köteklep, olarnıñ kameralarını çekip alğanlar.

Amma halqara ortaqlarımız Rusiye Federatsiyasınıñ Qırımdaki tecavüziniñ farqına barıp, adaletniñ tiklenmesinde yardımcı olmağa azır olğanlarını numayış ettiler ve böyleliknen Ukrainağa ciddiy şekilde qol tuttılar.

📌 ABD Prezidentiniñ fermanı (Executive order №13660) ile Ukrainağa qarşı RF tecavüzi munasebetinen ilk ABD sanktsiyaları amelge keçirildi.