2019 senesi Tışqı mustaqil baalavnıñ iştirakçilerini qayd etüv ve neticelerini belgilev ceryanları evelki senelernen qıyaslağanda deñişti, dep bildire Ukraina tasil keyfiyetini baalav merkezi.

Böyleliknen, slavân til gruppasına mensüp olmağan, ya da tamır halqlarınıñ tilinde tolu orta tasil alğan ve mahsus ihiyaçları olğan Tışqı mustaqil baalavnıñ iştirakçileri bu seneden başlap Tışqı mustaqil baalavdan keçkende ukrain tilinden ve edebiyatından imtian işi içün alğan test ballarnı (100-200 ballar ölçevine binaen) reyting baalarına keçirgende, maqbul keliştirüv aqqını qullana bileler.

Bu şahıslar içün (adettekinden daa alçaq) adaptiv sıñır belgilenecek ve adaptiv sıñır ile ”tapşırdı/tapşırmadı” şekilindeki adetteki sıñır arasındaki bütün test ballar ”100 ball” reyting baağa keçirilecektir.

Bundan da ğayrı, vaqtınca işğal etilgen topraqlarda yaşağan, ya da böyle topraqlardan köçip kelgen şahıslar Tışqı mustaqil baalavnıñ qoşma sessiyasında iştirak etmek içün qayd etilüvniñ em esas (kiçik ay (fevral) 5 kününden saban (mart) ayı 25 kününe qadar), em de qoşma (qural ay (mayıs) 3-20 künleri arasında) devirinde vesiqalarını tapşıra bileler.

Mütenasip deñişmeler Ukraina tasil ve ilim Nazirligi 07.12.2018 qabul etken ”Tışqı mustaqil baalav boyunca bazı normativ-uquqiy senetlerge deñişmelerni kirsetüv aqqında” 1353 sanlı Emirde bildirile.

Ukraina tasil keyfiyetini baalav merkezi Ukraina tarihi, riyaziyat, ayatiyat, coğrafiya, fizika ve himiya boyunca Tışqı mustaqil baalavnı qırımtatar, moldav, leh, rus, roman ve macar tillerinde tapşırmağa mümkün olğanını hatırlata.