Körüşüv esnasında insan aqlarınıñ bozuluvı meselesinen bir arada Qırımnıñ ve Romaniya içün de müim olğan Qaradeñiz regionınıñ silâlaştırıluvı, yarımadağa Rusiyeden avuştırılğan adamlar esabına yerli ealini almaştıruv, bala aqlarını bozuv, Rusiye Federatsiyası tarafından teşkil etilgen arbiy teşkilâtlarğa balalarnı celp etüv, Rusiye ordusına qanunsız şekilde gençlerni çağıruv, tabiatqa ketirilgen zarar, Ukraina Ortodoks Kilisesine basqı, tamır qırımtatar halqınıñ aq-uquqlarını bozuv kibi meseleler muzakere etildi. ,
2014 senesi saban (mart) ayında BM Baş assambleyasınıñ Qararnamesinde qayd etilgen izçen tanımama siyaseti meselesine de diqqat ayırıldı. İşğalci organlar tarafından areket sıñırlanması munasebetinen yañı çağıruvlar ve BM Baş Assambleyasınıñ Qırımğa bağışlanğan beyannamesini yañartuv ayrıca muzakere etildi.
Bundan ğayrı, taraflar vaqtınca işğal etilgen yarımadada COVİD-19 pandemiyası ile bağlı vaziyet aqqında qonuştılar.
Romaniya Ukrainanıñ Rusiye tecavüzine qarşı küreşinde memleketimizniñ daimiy ortağıdır. Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç Romaniyanıñ Ukrainada Fevqulâde ve Tolu Vekâletli Elçisi Kristian-Leon Tsurkanuğa Qırım mevzusınen meraqlanğanı içün öz minnetdarlığını bildirdi.