Ukraina Prezidentiniñ Qırım MC-deki Temsilciligi halqara forumlarda, diplomatlarnen qonuşqanda, 2014 senesinden başlap Rusiye Federatsiyası Qırım yarımadasınıñ sakinlerine qarşı keçirgen cezalavlar, insan aqlarınıñ bozuluvları aqqında malümat bergende zorbalıqnen ğayıp oluvlar meselesini daimiy şekilde kötere;

 Halqara uquq şartlarını bozğan ve yarımadada qorqu müitini yaratqan tedbirler vazifesini becergen zorbalıqnen ğayıp oluvlar meselesi ”Qırım platforması” halqara meydançığınıñ faaliyetlerinden biri olacaq;

 Qırımda zorbalıqnen ğayıp oluvlar meselesi vaqtınca işğal etilgen Qırım Muhtar Cumhuriyetinde insan aqlarınıñ bozulmasına dair BM teşkilâtınıñ Baş assambleyası tarafından qabul etilgen er bir qararnamege kirsetile, bu yıl da qararname leyhası Baş Assambleyasınıñ Üçünci Komiteti tarafından taqdirlendi ve 2020 senesi ilk qış ayında onıñ qabul etilmesi beklenile;

 Zorbalıqnen ğayıp oluvlarğa dair taqiqatlarnı Qırım Muhtar Cumhuriyeti ve Aqyar şeeri Prokuraturası, Baş prokuror Ofisi, hususan onıñ sözde ”cenk departamenti” alıp bara. Bu cinayetler aqqında malümatlar devletlerara şikâyetler olaraq İnsan aqları boyunca Avropa mahkemesine ve Halqara ceza mahkemesine taqdim etile;

 Yazıqlar olsun ki, (mahsus şaraitlerde) habersiz ğayıp olğanlar boyunca Komissiya çalışmağa ale daa başlamadı, o ise ğayıp olğanlarnıñ aqabalarına qol tutmalı ve ğayıp olğanlarnıñ cedvelini alıp barmalıdır. Qurucı toplaşuv ötkerildi, amma komissiyanıñ başlığı, kâtibiyeti ve eñ esası – mahsus şaraitlerde ğayıp olğanlarnıñ cedvelini tertip etecek şahıs belgilenmedi;

 Komissiyanıñ tolu şekilde çalışması içün mütenasip qanunğa deñişmeler kirsetilmeli, cemaat teşkilâtlarınen, Ukraina adliye Nazirliginen, Ukraina halq deputatları ile beraberlikte işbu deñişmeler al-azırda azırlandı. Temsilcilikniñ ekspertleri de işbu faaliyette iştirak etti.

”Ukrainada keçici devirde adalet meselesi üstünde de çalışmamız müim, çünki işbu qavrayış dört esas qısımdan ibaret – akimiyet aqqı, qurbanlarğa tazminat, eñ ağır cinayetler içün mesüliyet ve olarnıñ tekrarlanmaması oğrunda islâatlar. Bu qısımlarnıñ episi biri-birinen bağlı, olarnıñ bir-birinden ayrı baqılması imkânsızdır. Akimiyet aqqı – keçici devirde adliyeniñ qısımlarından biri, onıñ içün zorbalıqnen ğayıp oluvğa dair er bir adise qayd etilmeli, işbu meselenen oğraşqan er bir insanğa öz minnetdarlığımnı bildirem. Aqiqat pek qıyın körünse de, biz onı bilmelimiz”, – dep yekünledi öz çıqışını Ukraina Prezidentiniñ Qırım Muhtar Cumhuriyetindeki Daimiy Temsilcisiniñ muavini Tamila Taşeva.