Bügün, yani 2020 senesi ilk yaz ayınıñ 23-de, Ukraina Prezidentiniñ Qırım MC-deki Daimiy Temsilcisi Anton Korınevıç resmiy eyet terkibinde Ukraina ile Avropa Birligi arasında insan aqları boyunca Dialogda iştirak etti.
Ukraina eyetine Avropağa integratsiya etüv meseleleri boyunca Ukraina adliye Naziriniñ muavini Valeriya Kolomiyets yolbaşçılıq yaptı. Dialog kün devamında Kıyiv ile Brüssel arasında onlayn alâqa vastaları yardımınen keçirile ve 12 tematik bloktan ibarettir. Eyetniñ Başlığı devlet tarafından insan aqları boyunca Milliy strategiyanıñ yerine ketirilmesine bağışlanğan çıqışını bitirgen soñ, saba oturuşuvı vaqtınca işğal etilgen Qırım ve Donbas topraqlarında insan aqlarına riayet etüv kibi müim meselenen başlanğan edi.
Ukraina Prezidentiniñ Qırım MC-deki Daimiy Temsilcisi Anton Korınevıç öz çıqışını Qırım yarımadasında insan aqları saasında vaziyet, qırımtatar halqı aq-uquqlarınıñ bozuluvı meselesine bağışladı.
Maruzasında aşağıdaki mevzular tarif etilgen edi:
- Gençleni işğalci akimiyetiniñ Silâlı quvetlerine qanunsız şekilde çağıruv;
- Qırımda tasil ceryanını arbiyleştirüv;
- Qırmı yarımadası ealisiniñ demografik terkibini deñiştirüv;
- Diniy serbestlik aqqını bozuv ve diniy alâmetler boyunca taqip etüv;
- Qırımtatar halqını taqip etüv;
- Ukraina vatandaşlarına Qırım MC ve Aqyar şeerinde topraq mülkiyetini yasaq etüv;
- Ukrain ve qırımtatar tillerinde tasilge irişim.